නීතිවිරෝධීව රටින් පිටතට ගෙනයෑමට සැලසුම් කර තිබූ රයිනෝ අං කිලෝග්‍රෑම් 116ක් අත්අඩංගුවට ගැනීමට දකුණු අප්‍රිකානු බලධාරීන් සමත් වී ඇත.

මෙහි ඩොලර් මිලියන 1.3ක වටිනාකමින් යුත් රයිනෝ අං 36ක් තිබී හමුවී ඇත. 

පසුගිය වසර කිහිපය තුළ එරටින් අල්ලා ගන්නා ලද විශාලම තොගය මෙය යැයි සැලකේ. 

ජොහැන්ස්බර්ග්හි ටැම්බෝ ගුවන්තොටුපල රේගුව විසින් ලිසී නම් සුනඛයෙකුගේ උපකාරයෙන් මෙම සොයාගැනීම සිදුකර ඇත.

මේවා සැරසිලි උපකරණ තොගයක් සමග ඉතාමත් සූක්ෂමව පෙට්ටි අටක අසුරා තිබී ඇති අතර ඩුබායි වෙත ගෙන යෑමට නියමිතව තිබුණු බව රේගු බලධාරීහු පවසති.

දකුණු අප්‍රිකාවේ විශාල වශයෙන් සිදුකළ රයිනෝ දඩයම දැඩි නීතිරීති ක්‍රියාත්මක කිරීම මත 2014 වර්ෂයේ සිට ක්‍රමයෙන් අඩුවූ නමුත් මේ වනවිටත් වසරකට රයිනෝ සතුන් 1000ක් පමණ ඝාතනය කරන බව සඳහන් වේ.

චීනයේ සහ වියට්නාමයේ රයිනෝ අං යොදාගෙන පාරම්පරික ඖෂධ නිෂ්පාදනය  සිදුකරයි. 

(බිබිසී ඇසුරිණි - 085)