ඕස්ට්‍රේලියාවේ නිව් සවුත් වේල්ස්හි පසුගිය දින කිහිපයේ ඇතිවූ ලැව් ගිනි හේතුවෙන් නිවාස 30ක් පමණ විනාශ වී ඇතැයි වාර්තා වේ. 

ආසන්න ක්වීන්ස්ලන්ඩ් ප්‍රාන්තයේ ද ස්ථාන කිහිපයක ලැව්ගිනි හටගෙන ඇති අතර පරිසර උෂ්ණත්වය සෙල්සියස් අංශක 40ක් වැනි ඉහළ අගයක් ගැනීම හේතුවෙන් ගින්න වඩාත් වේගයෙන් පැතිරෙන බව බලධාරීහු පවසති.

එක් පුද්ගලයකු බරපතල ලෙස පිළිස්සුම් තුවාල ලබා ඇති බවත් ඔහු ගිනි ඇවිලීමට මුල්වූ පුද්ගලයකු බවට සැකකරන බවත් ඔවුහු වැඩිදුරටත් සඳහන් කරති.

ගිනිගැනීම් හේතුවෙන් මේවනවිට හෙක්ටයාර 100000ක් පමණ විනාශ වී ඇත. සමහර ප්‍රදේශ වල සති කිහිපයක් තිස්සේ ගිනි ඇවිලෙමින් තිබෙන බව පැවසේ.

ඕස්ට්‍රේලියාවේ ගිනිකොන දිග ප්‍රදේශයේ දැඩි නියං තත්ත්වයක් හටගෙන ඇති අතර එය දේශගුණික විපර්යාසයන්ගේ බලපෑම හේතුවෙන් වඩාත් තීව්‍ර වී ඇති බව විද්‍යාඥයෝ පවසති.

(බීබීසී ඇසුරිණි - 085)