අංජුල මහික වීරරත්න
 
මෛත්‍රීපාල සිරිසේන ජනාධිපතිවරයාගෙනුත් අගමැති ඇමැති යනුවෙන් කාඩ්බෝඩ් පුවරු ඔසවාගෙන ගිය අයගෙනුත් දැන්වත් ව්‍යවස්ථාව අනුව වැඩ කරන්නැයි ඉල්ලා සිටින බව එක්සත් ජාතික පෙරමුණේ නායක රනිල් වික්‍රමසිංහ මහතා අද (04 ) පැවසීය.

කාට හෝ ආණ්ඩුක්‍රම ව්‍යවස්ථාව ආරක්ෂා  කරන්නට බැරි නම් තනතුරුවල සිටීමට අයිතියක් නැති බව කී වික්‍රමසිංහ මහතා සියලු දෙනා ව්‍යවස්ථාවත් ආරක්ෂා කරන්නට දිවුරුම් දී තිබෙන බව හොඳින් සිහි තබා ගත යුතු බවද සඳහන් කළේය.

ව්‍යවස්ථාවට පටහැනිව නොයෙක් ක්‍රියා කරන්නැයි කියන අය ව්‍යවස්ථා විරෝධීන් ලෙස පිළිගත යුතු බව කී වික්‍රමසිංහ මහතා නීතිය අනුව වැඩ කරන්නැයි රජයේ නිලධාරීන්ට  පවසන බව කීය.

ශ්‍රේෂ්ඨාධිකරණ තීන්දුව මෙන්ම අභියාචනාධිකරණ තීන්දුව අගය කරන බවද රනිල් වික්‍රමසිංහ මහතා වැඩිදුරටත් කීය.
කොළඹ අරලියගහ මන්දිරයේ දී මෙම මාධ්‍ය හමුව පැවැත්විණි.

ඡායාරූප සහ වීඩියෝ- ශාන්ත රත්නායක