(ඉන්දික අරුණ කුමාර)
 
නාඋල ප්‍රාදේශීය ලේකම් කොට්ඨාසයට අයත් ගම්මාන රැසක පැතිර යන ‘කළු කොඩයි’ ලෙස හැඳින්වෙන කූඹි විශේෂයක් හේතුවෙන් ගොවීහු මහත් අපහසුතාවට පත්ව සිටිති.
 
ශාකවල කූඩු ඉදිකර ගනිමින් දහස් ගණනක් බිත්තර දමා රැඳී සිටින කළු කොඩයි හේතුවෙන් වගා රැසක අස්වනු නෙළීමට නොහැකිව, මෙම කූඹීන්ගේ පහරකෑමට ලක්ව ඇති බව ගොවීහු කියා සිටිති.
 
වර්ෂා සමයට ඔරොත්තු දිය හැකි පරිදි සිය නිවාස තනා ගැනීම සඳහා මොවුන් තේක්ක, කජු වැනි ශක්තිමත් ශාක යොදා ගන්නා බවද,  අඹ, පේර, ගස්ලබු වැනි ශාකවලද, කූඹි විශේෂය බෝංචි, මෑ, කරල්, වැටකොළු ආදී වගාවලට ද පැතිර යමින් පවතින බවද නාඋල  ගොවීහු කියා සිටිති.
 
නාඋල ප්‍රාදේශීය ලේකම් කොට්ඨාසයට අයත් කෘෂිකර්ම නිෂ්පාදන සහකාරවරු කියාසිටියේ මෙම කුඹි විශේෂයෙන් වගාවන්ට හානි සිදුනොවන බැවින්, අනියත බියක් ඇතිකරගත යුතු නැති බවයි. විවිධ කෘමීන් ආහාරයට ගනිමින් ජීවත්වන මෙම කූඹි විශේෂය සතුරාට කණ්ඩායම් වශයෙන් පහදීම් සිදුකරන බවත් ඔවුහු පැවැසූහ.