(සිතුම් චතුරංග)

වවුනියාව සේමමඩු රක්ෂිතයේ සිට නීතිවිරෝධී අයුරින් බුරුත දැව ප්‍රවාහනය කරමින් තිබූ කැබ් රථයක් අද (15) උදෑසන යාපනය - නුවර ඒ 9 මාර්ගයේ තාණ්ඩිකුලම ප්‍රදේශයේදී අනතුරට ලක්ව ඇති බව වවුනියාව පොලිසිය කියයි.

සේමමඩු රක්ෂිතයේ සිදුවන දැව ජාවාරමක් පිළිබඳ වවුනියාව දූෂණ මර්දන අංශයේ නිලධාරීන් වෙත ලැබුණ තොරතුරක් මත පොලිස් මාර්ග බාධක යොදා සිදුකළ වැටලීමකදී එම මාර්ග බාධක මගහැර ධාවනය කිරීමට උත්සහ කළ කැබ්රථය මෙලෙස අනතුරට පත්ව ඇති බව පොලිසිය සඳහන් කරයි.

කැබ් රථයේ නීතිවිරෝධීව කපන ලද බුරුත දැව කඳන් 9 ක් පටවා තිබූ අතර පොලිසිය මඟහැරයෑමට කැබ්රථය අතුරු මාර්ගයකට හැරවීමට උත්සහ කිරීමේදී කැබ්රථයේ රෝදයක් ගැලවීගොස් ඇති බව පොලිසිය පවසයි.

කැබ්රථය අනතුරට පත්වීමෙන් පසුව බුරුත දැව කඳන් තොගය රැගෙනයාම සඳහා තවත් කැබ්රථයක් පැමිණ ඇති අතර පොලිසිය පැමිණීමත් සමඟ අනතුරට පත් කැබ්රථයේ රියදුරු ද සමග එම කැබ් රථය පලා ගොස් ඇති බව පොලිසිය කීය.

වවුනියාව පොලිසිය පැවසූයේ දීර්ඝ කාලයක සිට මෙම දැව ජාවාරම සිදුකරගෙන ගොස් ඇති අතර වවුනියාව ප්‍රදේශයේ දැව මඩු සඳහා මෙලෙස බුරුත දැව කඳන් ප්‍රවාහනය කරන බවය.

අත්අඩංගුවට ගත් දැව තොගයේ වටිනාකම රුපියල් ලක්ෂ 6 ක් පමණ වන බවද පොලිසිය පැවසීය.

පැනගිය සැකකරුවන් හඳුනාගෙන ඇති අතර ඔවුන් අත්අඩංගුවට ගැනීම සඳහා විමර්ශන සිදුකරන බව පොලිසිය කියයි.