(තිළිණි ද සිල්වා)
 
හෙරොයින් සන්තකයේ තබා ගැනීම සහ ජාවාරම් කිරීම සම්බන්ධයෙන්  වරදකරු වූ අයෙකුට කොළඹ මහාධිකරණ විනිසුරු ශෂී මහේන්ද්‍රන් මහතා අද (13)  මරණ දඬුවම නියම කළේය.
 
මෙලෙස මරණ දඬුවම් නියම වූයේ කොළඹ, අලුත්කඩේ ප‍්‍රදේශයේ පදිංචිකරුවකු වන සිමියොන් විල්සන් නැමැති 26 හැවිරිදි විවාහක පුද්ගලයෙකුටය.
 
2018 වසරේ පෙබරවාරි මස 18 වනදා පොලිස් මත්ද්‍රව්‍ය නාශක කාර්යාංශය විසින් අලුත්කඩේ ප‍්‍රදේශයේ කළ වැටලීමකදී මත්කුඩු ග‍්‍රෑම් 60 .73 ක් සහ ගංජා ග‍්‍රෑම් 12.18 සන්තකයේ තබාගෙන සිටියදී මොහු අත්අඩංගුට ගෙන තිබුණි.
 
පසුව හෙරොයින් හා ගංජා සන්තකේ තබා ගැනීම සහ ජාවාරම් කිරීම යන චෝදනා යටතේ  විත්තිකරුට එරෙහිව නීතිපතිවරයා විසින් කොළඹ මහාධිකරණය හමුවේ නඩු පවරන ලදී.
 
තීන්දුව අද(13) ප‍්‍රකාශයට පත් කළ මහාධිකරණ විනිසුරු ශෂී මහේන්ද්‍රන් මහතා හෙරොයින් සහ ගංජා සන්තකයේ තබාගැනීම සහ ජාවාරම් කිරීම සම්බන්ධයෙන් විත්තිකරුට එල්ල කර තිබූ චෝදනාව සාධාරණ සැකයකින් තොරව පැමිණිල්ල ඔප්පු කර ඇති බව සඳහන් කළේය.

ඒ අනුව විත්තිකරුට හෙරොයින් සන්තකයේ තබා ගැනීම හා ජාවාරම් කිරීම සම්බන්ධයෙන් මරණ දඬුවම සහ ගංජා ළඟ තබා ගැනීම හා ජාවාරම් කිරීම චෝදනා වලට වරදකරු කරමින් වසරක් බැගින් සිර දඬුවම් නියම කරන බව විනිසුරු වරයා සිය තීන්දුවෙන් සඳහන් කළේය.