(කාංචන කුමාර ආරියදාස)

රාත්‍රී කාලයේ දඹුල්ල නගරයේ සැරි සරමින් වෙළඳසැල් වලට ඇතුළුවී මුදල් සොයන  සොරෙකු පිළිබඳ තොරතුරු අනාවරණය කර ගැනීම සඳහා දඹුල්ල පොලීසිය මහජන සහය පතයි.
 
දඹුල්ල නගරයේ ස්ථාන ගණනාවකට ඇවිද යමින්  ඊයේ (27)  මධ්‍යම රාත්‍රියේ වෙළඳසැල් දෙකක් කඩා ඇතුළු වී මුදල් සෙවීමේ කටයුතු කර ඇති  මෙම පුද්ගලයා පිළිබඳ තොරතුරු ආරක්ෂිත කැමරාවල සටහන්ව ඇතැයි පොලිසිය කියයි.
 
මෙම පුද්ගලයා දන්නා අයෙක් වෙතොත් දඹුල්ල මූලස්ථාන පොලීසියේ 066 - 22 84722 යන දුරකථන අංකයට දැනුම් දෙන්නැයි ද දඹුල්ල මුලස්ථාන පොලිස් පරීක්ෂක  එස්. පි. එදිරිසිංහ මහතා මහජනතාවගෙන් ඉල්ලීමක් කරයි.
 
දඹුල්ල බස් නැවතුම්පළ ඇතුළත ඇති ආපනශාලාවක වීදුරුවක් ගල්වලින් ගසා කඩා ඒ තුළට ඇතුළුවී එහි තිබූ  මුදල් ප්‍රමාණයක් රැගෙන ගොස් ඇතැයි වෙළඳසැල් හිමිකරු කියයි.
 
එදිනම රාත්‍රියේ දඹුල්ල නගරයේ පිහිටි සුපිරි වෙළඳසැලකට ද ඒ ආකාරයෙන්ම ඉදිරිපස වීදුරුව කඩා ඇතුළු වී එහි මුදල් සෙවීමේ කටයුතු සිදුකර ඇති බවද පොලිසිය කියයි.
 
මෙම සැකකරු සොයා පොලිස් කණ්ඩායම් කිහිපයක් දඹුල්ල නගරයේ සහ අවට ප්‍රදේශවල යෙදවූ බවත් යම් අයකු මෙම පුද්ගලයා පිළිබඳව තොරතුරක් දන්නේ නම් දඹුල්ල පොලිසියට හෝ ළඟම ඇති පොලීසියට ඒ බව  දැනුම් දෙන ලෙස පොලීසිය මහජනතාවගෙන් ඉල්ලීමක් කර සිටිති.