(නවරත්න සමරතුංග)
 
අම්පාර දිස්ත‍්‍රික්කයේ සේනානායක සමුද්‍රය ආශ‍්‍රිත ජල පෝෂක ප‍්‍රදේශවලට මේ දිනවල ලැබෙන වැසි හේතුවෙන් එහි ජල මට්ටම ඉහළ ගොස් ඇතැයි අම්පාර වාරිමාර්ග ඉංජිනේරු ඒ. ලියනගේ මහතා පැවසීය.

අද(28) අක්කර අඩි 80, 200යක ජල ප‍්‍රමාණයක් එකතුවී ඇති බවද ඒ මහතා කීය.

පසුගිය කාලයේ නැගෙනහිර පළාතට බලපෑ නියඟය නිසා අක්කර අඩි 12,000 දක්වා මෙම ජලාශයේ ජලය සීඝ‍්‍රයෙන් පහත වැටී තිබිණි.
 
ඒ අනුව අම්පාර දමන දකුණු ඉවුර සහ උහන වම්ඉවුර ඇතුළු අන්තර් පළාත්වල වී වගා කටයුතුවලට අවදානම් තත්වයක් උදාවී තිබිණි. එහෙත් මෝසම් වැසි ලැබීමෙන් එහි සමස්ත ජල ධාරිතාවය දැන් 10%ද ඉක්මවා ඇති මට්ටමක පවතින බවද වාරිමාර්ග ඉංජිනේරුවරයා කීය.
පසුගිය කාලයේ පැවති ජල හිගය සැලකිල්ලට ගෙන කඩින්කඩ පැවති වැස්සත් සමග ගොවි බිම් සකස් කරගන්නා ලෙස ගොවීන්ට උපදෙස් දී තිබුණ අතර සමන්තුර සහ අක්කරපත්තුව වැනි ප‍්‍රදේශවල ගොවීන් පමණක් බිම් සකස්කරගෙන තිබිණ. එහෙත් අම්පාර දිස්ත‍්‍රික්කයේ වම් සහ දකුණු ඉවුරුවල ගොවීන්ට බිම් සකස් කරගැනීමට නොහැකිව ප‍්‍රමාදයට ලක්විය.
 
මේ සම්බන්ධව වම්ඉවුර ව්‍යාපාරයේ නේවාසික කළමනාකරු ක‍්‍රිස්ටි දේවප‍්‍රිය මහතා අදහස් දක්වමින් කියාසිටියේ කන්න රැස්වීමේදී ගත් තීරණවලට අනුව ඔක්තෝබර් 1 දින සිට 21 දන දක්වා කාලයේ බිම් සකස්කර වී වපුරා අවසන් කිරීමට නියමිත වූ බවය.
 
කඩින් කඩ වැසි පැවතුණත් ගොඩට හාන්නට නොහැකි වීමෙන් හා වතුර නැතිව බිම් සකස් කර ගැනීමට නොහැකිවූ බැවින් නැවත කන්න රැස්වීම් තබා ගොවීන් රැස්කර ගෙන දින වෙනස් කරගැනීමට තීරණය කළ යුතුව ඇත.
 
එහෙත් ජනාධිපතිවරයෙකු තෝරාගැනීමට මැතිවරණයක් පවතින මෙවන් අවදියක රැස්වීම් පැවැත්වීම සුදුසු නොවන බැවින් අදාළ නිලධාරීන් සහ ආයතන ප‍්‍රධානීන් දෙදෙනා බැගින් කැඳවා දිසාපතිවරයාද සම්බන්ධ කරගෙන දින වෙනස් කළ බව ඔහු කීය. ඒ අනුව ඔක්තෝබර් මස 1 දින සිට නොවැම්බර් 10 දක්වා කාලය තුළ දමන සහ උහන ව්‍යාපාරවල ගොවිතැන් කිරීමට මෙසේ දින වෙනස් කරගෙන ඇත.