(ක.ග කරුණාරත්න හා නිමල් ජයරත්න)
 
වී කිලෝවක රජයේ සහතික මිල රුපියල් 50 දක්වා වැඩි කරන ලෙස ඉල්ලමින් මහවැලි බී කලාපයේ ගොවි අයිතීන් සුරකීමේ ඒකාබද්ධ සංවිධානය අද (26) පෙරවරුවේ වැලිකන්ද සෙවනපිටිය නගරයේ අඛණ්ඩ උපවාසයක් ඇරඹුහ. 
 
වැලිකන්ද මහසෙන්පුර මහසෙන් මහා විහාරයේ විහාරාධිපති කාර්යත්‍රී  උහුමීයේ සිරිසුමන රතන හිමියෝ සහ වැලිකන්ද අසේලපුර ඩී එක බෙදුම් ඇළ ගොවි සංවිධානයේ උප සභාපති එම්.ඩී.ධර්මසිරි (67) ගොවි මහතා ද උපවාසයට එක්ව සිටිති. 
 
රටේම සමස්ත වී ගොවීන් වෙනුවෙන් කරනු ලබන ඉතාමත්ම සාධාරණ ඉල්ලීම කෙරෙහි රජය ඇහුම්කන් දීමක් සිදු නොකළහොත් මෙය මාරාන්තික උපවාසයක් දක්වා ගෙන යන  බවත් හෙට (27) දිනය වන විට තවත් ගොවීන් පිරිසක් ඊට සහභාගී කරවීමට බලාපොරොත්තු වන බවත් ගොවි අයිතිය සුරැකීමේ සංවිධානයේ කැදවුම්කරු දිබුලාගල රාහුලාලන්කාර හිමියෝ ප්‍රකාශ කළහ. 
 
මහවැලි බී කලාපය තුළ පිහිටි ගොවි සංවිධාන 41 ක සහාය මේ සඳහා තිබෙන බවත් ඉදිරියේ දී අනෙකුත් ගොවි සංවිධානවල සහාය ඇතිව ගොවි අයිතිය වෙනුවෙන් දැවැන්ත අරගලයක් ආරම්භ කරන බවද උන්වහන්සේ කීහ. 

 

(ඡායාරූප - නිමල් ජයරත්න)