(දඹුල්ල කාංචන කුමාර ආරියදාස සහ නාඋල ඉන්දික අරුණ කුමාර)
 
වන අලියෙකු සිදුකළ පහරදීමකින් නාඋල නාලන්ද බෝගස් බොබැල්ල ප්‍රදේශයේ ආරාමයක වැඩසිටි සිල්මාතාවක් ඊයේ (29) දින රාත්‍රියේ අපවත්වී ඇතැයි නාඋල පොලිසිය කියයි.
 
මෙසේ අපවත් වී ඇති බෝගස් බොබැල්ල ප්‍රදේශයේ ආරාමයක වැඩ විසූ අතරගල්ලෑව ඥානමිත්තා නම් (60) හැවිරිදි සිල්මාතාවක් බව හඳුනාගෙන තිබේ.
 
ලංකාව පුරා වැඩසිටින සිල් මාතාවන්ගේ වාර්ෂික සම්මන්ත්‍රණ මාලාවක් ඊයේ (29) දින කොළඹ කැළණිය ප්‍රදේශයේ පැවැති බවත් එම අවස්ථාවට සහභාගී වී නැවතත් රාත්‍රියේ ආරාමයට ගමන් කරමින් සිටියදී මෙම වන අලි ප්‍රහාරය එල්ල වී ඇතැයි එම ස්ථානයට වැඩම කළ අනෙකුත් සිල්මාතාවෝ පැවසූහ.
 
අපවත් වූ සිල්මාතාවන්  සිය ආරාමයට මීටර් 100ක් පමණ ආපසින් අතුරු පාරකදි වන අලි ප්‍රහාරයට ලක්වී ඇති බව පොලිසිය කියයි.
 
නවුල බෝගස් බෝබැල්ල ප්‍රදේශයේ නිතර නිතර වන අලි ගැවසීම නිසා දැඩි භීතියට පත්ව තිබෙන බව ජනතාව චෝදනා කරති. වනජීවී නිලධාරීන්ට මේ බව දැනුම් දුන්නද කිසිදු ඵලක් නොවන බව එම ප්‍රදේශයේ වැඩ වසන භික්ෂු මහා සංඝයා වහන්සේලාද සඳහන් කළහ.
 
මෙම සිල් මාතාවන් වන අලි ප්‍රහාරයෙන් මිය ගොස් දහවල් වනතුරුත් කිසිදු වනජීවී නිලධාරියකු හෝ මෙම ස්ථානයට නොපැමිණි බවද ප්‍රදේශවාසීහු චෝදනා කරති.
 
මෙම ප්‍රදේශයේ අවට ගම්මාන කිහිපයක මේ වෙනකොට මිනිස් ජීවිත ගණනාවක්ම වන අලින් විසින් පහර දී ඝාතනය කොට තිබෙන බවද ප්‍රදේශවාසීහු පෙන්වා දෙති.
 
මෙම සිල් මෑණියන් ද   විදුලි පන්දමක් අතැතිව පා ගමනින් යන අතරතුර එකවරම වන අලියා මුහුණට හසු වී පහර දෙන්නට ඇති බව පොලීසිය සැක පළ කරති.
 
අපවත් වූ සිල් මාතාවගේ පශ්චාත් මරණ පරීක්ෂණ කටයුතු සිදුකිරීමට නියමිත බව නාඋල පොලිසිය සඳහන් කළේය.

(ඡායාරූප - දඹුල්ල කාංචන කුමාර ආරියදාස)

(ඡායාරූප - නාඋල ඉන්දික අරුණ කුමාර)