(සිතුම් චතුරංග)

වවුනියාව, සේමමඩු රක්ෂිතයෙන් කපන ලද  බුරුත දැවකඳන් පැටවූ කැබ්රථයක් සමඟ පුද්ගලයින් තිදෙනකු අද(07) අග්බෝපුර ඉදිකඩුව පාලම අසළදී අත්අඩංගුවටගත් බව මාමඩුව පොලිසිය කියයි.
         
බුරුත දැව ජාවාරමක් සම්බන්ධයෙන් මාමාඩුව පොලිස් ස්ථානාධිපතිවරයාට  ලැබුණ තොරතුරකට අනුව සිදුකළ වැටලීමකදී සැකකරුවන් බුරුත ගස් කපා දැවකඳන් කැබ්රථයක පටවා රැගෙනයමින් සිටියදී අත්අඩංගුවටගත් බව පොලිසිය පවසයි.
         
කැබ්රථයේ තිබී දැව කඳන් 15 සොයාගත් අතර එහි වටිනාකම රුපියල් ලක්ෂ හතක් පමණ වන බවද පොලිසිය සඳහන් කරයි.
         
පොලිසිය පැවසූයේ සැකකරුවන් තිදෙනා පොලිසිය දැක දැව කඳන් පැටවූ කැබ්රථයෙන් පලායෑමට උත්සහ කිරීමේදී රථය පාලනය කරගැනීමට නොහැකිව ඉ`දිකඩුව පාලමේ ගැටී අනතුරට ලක්වූ බවයි.
         
දීර්ඝ කාලයක සිට සේමමඩු රක්ෂිතයේ සිට මෙලෙස දැවකඳන් කපා රැගෙන ගොස් ඇති බවත් එලෙස රැගෙන යන දැවකඳන් රහසිගත ලෙස යාපනය ප‍්‍රදේශයට ප‍්‍රවාහනය කරන බවත් අනාවරණය වී ඇත.

අත්අඩංගුවටගත් සැකකරුවෝ වවුනියාව, පූන්තෝට්ටම් හා සේමමඩු ප‍්‍රදේශයේ පදිංචි අවුරුදු 25ත් 33 අතර වයසේ පසුවන්නෝ වෙති.

සැකකරුවන් වවුනියාව මහෙස්ත‍්‍රාත් අධිකරණයට ඉදිරිපත් කිරීමට නියමිතය.