රේල් පීලිවලට ගල් තැබූ අයෙකු රිමාන්ඩ්

(ඩී. ජී. සුගතපාල)
 
ගිංතොට දුම්රිය ස්ථානයේ රේල් පීලි දෙක අතර ගල්තබා අවහිර කිරීම සම්බන්ධයෙන් වරද පිළිගත් විත්තිකරුවෙකුට ගාල්ල අතිරේක මහේස්ත්‍රාත් පවිත්‍රා සංජීවනි පතිරණ මහත්මිය අද(04) බරපතල වැඩ සහිත මාස හයක සිර දඬුවමක් සහ රුපියල් 3,000ක දඩයක් නියම කර සිර දඬුවම වසර 5කට අත්හිටවනු ලැබුවාය.
 
මෙසේ දඬුවම් නියම වූයේ ගිංතොට දුම්රියපොළ ආසන්නයේ පදිංචි දුම්රිය දෙපාර්තමේන්තුවේ විශ්‍රාමිකයෙකු වන කංකානම්ගේ පේමදාස නමැති සැකකරුවෙකුටය.
 
මෙයට පෙර  අවස්ථා කිහිපයකදී ද ඔහු එක් මාර්ගයකින් අනෙක් මාර්ගයට මාරුවන (පයින්ටු)  පීලි අතර ගල්තබා දුම්රිය ගමනාගමනයට බාධා කර ඇති අතර ඒ පිළිබඳ ගිංතොට දුම්රිය ස්ථානාධිපතිවරයා විසින් දුම්රිය ආරක්ෂක හමුදාවට පැමිණිලි කර තිබින.
 
ඒ අනුව පරීක්ෂණ පැවැත්වූ දුම්රිය ආරක්ෂක හමුදාවේ  නිලධාරීන් කණ්ඩායමක්  එම ප්‍රදේශයේ ආරක්ෂිත කැමරා පරීක්ෂා කර සැකකරු අත්අඩංගුවට ගෙන ඇත.
 
ගිංතොට දුම්රිය ස්ථානයේ ස්ථාධිපතිවරයා සමග ඇතිවූ පෞද්ගලික ආරවුලක් හේතුවෙන් දුම්රිය මාර්ගයට මෙසේ ගල් තබා ඇති බව පරීක්ෂණවලදී අනාවරණය විය.
 
අත්අඩංගුවට ගත් සැකකරු හිතාමතාම හෝ ද්වේශ සහගත ලෙස ගල් දමා දුම්රිය මාර්ගයේ පයින්ටු අවහිර කර, දුම්රිය දේපලවලට සහ මගීන්ගේ ජීවතවලට තර්ජනයක් වන ආකාරයෙන් කටයුතු කිරීම යන චෝදනාව යටතේ අධිකරණයට ඉදිරිපත් කරනු ලැබීය.