(කේ බුද්ධික කුමාරසිරි )
 
මීගොඩ හේනවත්ත ප‍්‍රදේශයේ දෙමහල් නිවසක උඩු මහලට යාමට ඉදිකල පිය ගැට පෙළක් තාවකාලික සිවිලිමකින් ආවරණය කර තිබියදී එය මතින් ගොස් රෙදිවැලක් ගැට ගැසීමට ගිය කාන්තාවක් සිවිලිමත් සමග ඇඳ වැටීමෙන් බරපතල තුවාල ලබා හෝමාගම මූලික රෝහලට ඇතුළත් කිරිමෙන් පසු අද (24) මිය ගොස් ඇතැයි මීගොඩ පොලිසිය පවසයි.

මිය ගිය කාන්තාව අදාල නිවසෙහි කුඩා දරුවෙකු රැක බලා ගැනීම සදහා දිනපතා සතියේ දිනවල පැමිණ ඇති බවත් සිද්ධිය වූ දින පැමිණ රෙදි කිහිපයක් සෝදා වියළීම සදහා නිවසෙහි උඩුමහලෙහි රෙදි වැළක් ගැට ගැසීමට යාමේදී තාවකාලික ආවරණයක් යොදා සිවිලිමක් සකස් කර තිබූ ආවරණය මතට ඇද වැටී  තිබේ.

එම තාවකාලික සිවිලිම ද සමගින් අඩි 9 ක් පමණ පහලට ඇද වැටෙන්නට ඇති බවට අදාල ස්ථානය පරීක්ෂා කිරීමෙන් පසු දක්නට ලැබුණු තත්වය අනුව සැක පල කළ හැකි බවද පොලිසිය පවසයි.

මෙලෙස මිය ගොස් ඇත්තේ මීගොඩ පරණ පාර වටරැක පදිංචිකාරියක වන අමරසිංහ ආරච්චිගේ පියසීලී නමැති 60 හැවිරිදි දෙදරු මවකි.

සිද්ධිය සම්බන්ධයෙන් මීගොඩ පොලිසිය වැඩිදුරටත් පරීක්ෂණ පවත්වයි.