(පාලිත ආරියවංශ)
ඇල්ල- වැල්ලවාය මාර්ගයේ රාවණාඇල්ල 23 සහ 24 කිලෝමීටර් කණු අතර(මවුන්ට් හෙවන් හෝටලයට නුදුරින් ) ඇති වංගුවකදී ත්‍රිරෝද රථයක්  අඩි 400 ක පමණ ප්‍රපාතයට පෙරළී  සිදුවූ අනතුරකින් ත්‍රිරෝද රථයේ ගමන්කළ  6 දෙනාගෙන් දෙදෙනෙක් මියගොස් 4ක්  බරපතල තුවාල ලබා ඇත.

ඔවුහු බදුල්ල සහ බණ්ඩාරවෙල රෝහල්වල ප්‍රතිකාර ලබති. මෙසේ අනරතුරට පත්ව ඇත්තේ  වැල්ලවායේ ඥාතියෙකුගේ මළ ගමට ගොස් ගෙදර යමින් සිටි එකම පවුලකට අයත් පිරිසකි.

එක පිරිසක පියා විසින්  ත්‍රිරෝද රථය පැදවු අතර  අතර පිටුපස අසුනේ ඔහුගේ බිරිද හා දරුවෙක් ද අනෙක් පිරිසේ මව සහ  දරුවන් දෙදෙනෙකු   ගමන් කර තිබේ .

බදුල්ල මහ නගර සභාවේ ගිනිනිවීම් හා ජීවිත බේරාගැනීමේ ඒකකයෙන් නිලධාරින් පැමිණ  ඇල්ල පොලිසිය හා ප්‍රදේශවාසීන්ගේ සහායද ඇතිව මහ ප්‍රපාතයේ සිටි තුවාලකරුවන් ගොඩගත් බව පොලීසිය කියයි.

ත්‍රිරෝද රථය  පැදවු පුද්ගලයා  ළමයෙක් හා කාන්තාවක් බදුල්ල මහරෝහලට යැවු නමුත් කාන්තාව එහිදි මියගොස් තිබේ.

අනෙක්  කාන්තාව හා ළමයි දෙදෙනෙක් බණ්ඩාරවෙල මූලික රෝහලට රැගෙන ගිය නමුත් එහිදි එම කාන්තාවද මියගොස් ඇත. 

මීගහකිවුල අරාව සහ ඇල්ල ගොටුවෙල  පදිංචි මෙම පවුල් දෙකේ කාන්තාවන් දෙදෙනා නෑනලා වන බවද විමර්ශනවලදී අනාවරණය වී තිබේ.

මියගොස් ඇත්තේ නිලංගිකා දිල්හානි 36 සහ විජේසුන්දර මුදියන්සේලාගේ ඥානවතී (38)යන දෙදෙනාය. 

42 හැවිරිදි  ත්‍රිරෝද රථය පැදවූ  පුද්ගලයා, අවුරුදු  10 සහ,අවුරුදු 16 යන වසස්හි පසුවන පිරිමි ළමුන් දෙදෙනා හා  8 හැවිරිදි   ගැහැණු ළමයා බදුල්ල සහ බණ්ඩාරවෙල රෝහල්වල ප්‍රතිකාර ලබති.