(විජේරත්න රත්නායක )
                      
වසර කිහිපයක සිට බදුල්ල නගරයේ යතුරුපැදි සොරකම් කළ බවට සැකපිට අත් අඩංගුවට ගෙන අධිකරණය වෙත ඉදිරිපත් කළ අයෙකු මේ මස 16 වැනිදා තෙක් රක්ෂිත බන්ධනාගාරගත කරන ලෙස බදුල්ල මහේස්ත්‍රාත්වරයා  අද(11)නියෝග කළේය.
 
මෙසේ රක්ෂිත බන්ධනාගාරගත කෙරුණේ බදුල්ල සුමනතිස්සගම පදිංචි 52 හැවිරිදි පුද්ගලයෙකි.
 
යතුරුපැදි 8 ක්ද සමඟ ඔහුව අත්අඩංගුවට ගෙන තිබිණි.
                      
තමන් පදිංචි ස්ථානයේම යතුරුපැදි අලුත්වැඩියා කරන ගරාජයක් පවත්වාගෙන ගිය සැකකරු දක්ෂ යතුරුපැදි කාර්මිකයෙකු මෙන්ම යතුරුපැදි ධාවකයෙකු වන බවද, දිවා කාලයේ බදුල්ල නගරයේ විවිධ මට්ටමේ පුද්ගලයන් හා ඉතා සමීපව ඇසුරු කරමින් යතුරුපැදි ඇති නිවෙස් හඳුනාගෙන රාත්‍රී කාලයේ ගොස් වෙනත් යතුරක් ආධාරයෙන් යතුරුපැදිය පණගන්වා සොරාගෙන ගොස් ඇතිබවද, මොහු වසර හතරක පමණ කාලයක් තිස්සේ සොරකම් කර ඇතැයිද බදුල්ල පොලීසිය කියයි.
 
එසේම ඔහු විසින් මෙසේ සොරකම් කොට ඇති යතුරුපැදි සියල්ලම පාහේ එකම වර්ගයක (සුසුකි) යතුරුපැදි බවද අනාවරණය වී ඇත.
 
මෙසේ සොරකම් කළ ඇතැම් යතුරුපැදි අලෙවි කර හෝ කොටස් කර හෝ ඇතැයිද සැකකෙරේ.

මේ සම්බන්ධයෙන් ලැබුණු පැමිණිලිවලට අනුව බදුල්ල මූලස්ථාන පොලිසියේ නිලධාරීන් කළ වැටලීමකට අනුව සැකකරු අත්අඩංගුවට ගෙන තිබිණි.