(තිලකරත්න දිසානායක)

පරිභෝජනයට නුසුදුසු, එක්කෝටි හැත්තෑ ලක්ෂක් පමණ වටිනා හාල්මැස්සන් වෙළඳපොළට නිකුත් කිරීම පිණිස මාබෝලේ ප්‍රදේශයේ ගබඩාවක සකස් කරමින් තිබියදී පාරිභෝගික සේවා අධිකාරියේ ගම්පහ දිස්ත්‍රික් විමර්ශන ඒකකය මගින් අද(17)අත්අඩංගුවට ගෙන ගබඩාවට මුද්‍රා තැබීමට පියවර ගෙන තිබේ.

මෙහිදී හාල්මැස්සන් තොගය ගෙන්වා  ඇති පුද්ගලයා O අත්අඩංගුවට ගෙන ඇත'

එම ඒකකයට ලැබූණු  තොරතුරක් මත එහි ප්‍රධානී ප්‍රදීප් කළුතරආරච්චි මහතා ඇතුළු නිලධාරීහු අද (17) සවස මෙම වැටලීම කළහ.

හාල්මැස්සන් කිලෝ ග්‍රෑම් 21,400 ක තොගයක් මෙහිදී සොයාගෙන තිබිණි.

ඩුබායි සිට වැලි සහිතව ආනයනය කර ඇති මෙම හාල්මැස්සන් තොගය මිනිස් පරිභෝජනයට නුසුදුසු ලෙසින් පවතින බැවින් ඒවා තෝරා වෙළෙඳපොළට යැවීම පිණිස මෙම ගබඩාවෙහි සකස් කරමින් තිබූ බව ප්‍රදීප් කළුතරආරච්චි මහතා  පැවසීය.

පාරිභෝගික සේවා අධිකාරියේ සභාපති ලලිත් සෙනෙවීර සහ ගම්පහ දිසාපති සුනිල් ජයලත් මහතාගේ උපදෙස් මත සිදු කළ මෙම වැටලීම සඳහා එම අධිකාරියේ  ගම්පහ දිස්ත්‍රික් විමර්ශන ප්‍රධානී ප්‍රදීප් කළුතරආරච්චි මහතාගේ මෙහෙයවීම යටතේ විමර්ශන නිලධාරීන් වන වයි.එම්.එස්. යාපාරත්න, ඉෂාර කළුබෝවිල, දිලීප කරුණාරත්න, එච්.කේ. රවිඳු සහ ඉෂාර හෝමපොළ යන මහත්වරුන් කටයුතු කර ඇත.

අත්අඩංගුවට ගත් සැකකරු වත්තල මහේස්ත්‍රාත් අධිකරණය වෙත ඉදිරිපත් කිරීම පිණිස බැඳුම්කර ඇප මත මුදා හැර ඇත.