(රොමේෂ් මධුෂංඛ)

කිලිනොච්චිය ප්‍රදේශයේ නිධන් හෑරීමට ගිය සැකකරුවන් සිව්දෙනෙකු සමඟ අධි තාක්ෂණයෙන් යුත් නවීන ස්කෑනර් යන්ත්‍රයක් අද (7)  හමුවූ බව මාන්කුලම පොලිසිය පවසයි.

රුපියල් ලක්ෂ 25 කට අධික වටිනාකමකින් යුත් මෙතෙක් හමු නොවූ වර්ගයේ ස්කෑනර් යන්ත්‍රයක් ද සැකකරුවන් ගමන් කළ මෝටර් රථයේ තිබී හමු වී ඇත.

අත්අඩංගුවට ගත් සැකකරුවන් හා නඩු භාණ්ඩ අධිකරණයට ඉදිරිපත් කිරිමට නියමිතය.

සැකකරුවන් සිව්දෙනා සුකෝපභෝගී මෝටර් රථයකින් ගමන් කරන අතරතුර මාන්කුලම් නගරයේ දී අත්අඩංගුවට ගෙන ඇත.

ඔවුන්ගෙන් එක් අයෙකු මහියංගනය ප්‍රදේශයේ රත්තරන් වෙළඳසැළක හිමිකරුවකු වන බව සිදුකළ පරික්ෂණ වලදී අනාවරණය වී තිබේ.

එම ස්කෑනර් යන්ත්‍රය මගින් අඩි 54 ක ගැඹුරක් මෙන්ම මීටර් 30 ක වපසරියක භූමි ප්‍රමාණයක් එකවර පරික්ෂා කළ හැකි අධි තාක්ෂණයකින් යුත් මෙම ස්කෑනර් යන්ත්‍රය ඩුබායි රටේ සිට රැගෙනවිත් ඇති බවටද පරීක්ෂණ වලදී අනාවරණය වී තිබේ.

සැකකරුවන් සිව් දෙනා අතර විශ්‍රාමික සාජන් මේජර්වරයකු ද සිටින අතර ඔවුන්ගෙන් එක් අයුකු මහියංගනය ප්‍රදේශයේත් අනෙක් තිදෙනා බදුල්ල ප්‍රදේශයෙත් පදිංචිකරුවෝ වෙති.