(ලලිත් නවරත්න)

ආරච්චිකට්ටුව වෛරන්කට්ටුව වාකරේ ප්‍රදේශයේ පොල්වත්තක නිදන් හාරමින් සිටි හිටපු ප්‍රාදේශීය සභා මන්ත්‍රීවරයෙකු ඇතුලු පුද්ගලයින් 10 දෙනෙකු අද (08) අත්අඩංගුවට ගත්බව ආරච්චිකට්ටුව පොලිසිය පවසයි.

මෙම පිරිස සමඟ බැකෝ යන්ත්‍රයක් ඇතුලු භාණ්ඩ තොගයක් ද අත්අඩංගුවට ගත්බව පොලිසිය කීය.

පොලිස් කණ්ඩායම එම ස්ථානයට යනවිටත් බැකෝ යන්ත්‍රය මගින් අඩි 30 කට වැඩි ප්‍රමාණයක වලක් හාරා තිබූ බව පොලිසිය පැවසීය

එහි එකතුවන ජලය ඉවත් කිරීමට අධිබලැති ජල පොම්ප 5 ක් යොදවාගන තිබූ බවත් නිධානය ගොඩගැනීම සඳහා තවත් අඩි 4 ක පමණ ප්‍රමාණයක් ඇති බව සැකකරුවන්ගෙන් සිදුකළ ප්‍රශ්න කිරීම් වලදී හෙළි වූ බවත් පොලිසිය කීය.

මෙම පිරිස මීට දින 05 කට පමණ පෙර මෙම වත්තේ නිවසක ලැගුම් ගෙන ඇති බවත් බැකෝ යන්ත්‍රය හලාවත ප්‍රදේශයේ ව්‍යාපාරිකයෙකුගෙන් කුලී පදනම යටතේ ලබාගෙන ඇති බවත් පොලිසිය පැවසීය.

තවත් සැකකරුවන් කිහිපදෙනෙකු හලාවත බංගදෙනිය ප්‍රදේශයේ හෝටලයක නැවතී සිට මෙම නිදන් ගොඩගැනීමේ කටයුත්ත සඳහා එහි සිට පැමිණ ඇති බව පොලිසිය කීය.

බැකෝ යන්ත්‍රයක් , මෝටර් රථ දෙකක් , යතුරුපැදි දෙකක් ,  යන්ත්‍ර සහිත සුර 08 ක්  , දුරකථන 12 ක් , මේනු කෙවෙනි සහිත වයර් රෝලක් ,  වතුර මෝටර් 05 ක් වතුර බට තොගයක් , චේන් බොලොක්කයක් පොලිසිය මගින් අත්අඩංගුවට ගෙන ඇත.

සැකකරුවන් අධිකරණයට ඉදිරිපත් කිරීමට නියමිත බව පොලිසිය පැවසීය.