(ඔගස්ටින් ප්‍රනාන්දු) 
 
පල්ලම කම්මන්දළුව ප්‍රදේශයේ වෑන් රථයකින් සංඥා කුළුණු වලින් ගලවා ගෙන යමින් තිබු බැටරි 13 ක් ප්‍රවාහනය කරමින් සිටි පුද්ගලයන් තිදෙනෙකු අත්අඩංගුවට ගත් බව පල්ලම පොලිසිය කියයි.
 
පල්ලම පොලිසිය නිලධාරීන් පිරිසක් මුර සේවයේ නිරතව සිටියදී මෙම වෑන් රථය නවතා පරීක්ෂා කර ඇත.
 
බැටරි එක්තරා පුද්ගලයෙකුට බාර දෙන ලෙසට දුන් බව වාහනයේ සිටි තිදෙනා පවසා ඇති බවත් පොලිසිය පවසයි.
 
පොලිසිය විසින් මේ බව දුරකතන සමාගම්වලට දැනුම් දුන් පසු බිංගිරිය වීරපොකුණ දුරකතන කුළුණක සවි කර තිබූ බැටරි 15 න් 13 ක් කිසිවකු ගලවාගෙන ගොස් ඇති බවත් එම සමාගමේ නියෝජිතයෙකු පැමිණ අත් අඩංගුවට ගෙන ඇති බැ‍ටරි තම සමාගමට අයත් ඒවා බබවට තහවුරු කර ඇති බවත් පොලිසිය වැඩිදුරටත් කියයි. 
 
අත්අඩංගුවට ගත් සැකකරුවන් පොළොන්නරුව සහ කොටවෙහෙර පොලිස් වසමේ පදිංචි වයස 32ත් 27 ත් අතර පසුවන අය බවත් කියයි.
 
සැකරුවන් ආණමඩුව අධිකරණය හමුවට ඉදිරිපත් කිරීමට නියමිතය.