(වසන්ත චන්ද්‍රපාල)

දීඝවාපි ගම්මානයේ පිහිටා තිබෙන ග්‍රාමීය රෝහලේ සේවාවන් පුළුල් කරදෙන ලෙස ඉල්ලා එම ගම්මානයේ ජනතාව දීඝවාපි රෝහල ඉදිරිපිටදී අද (27) විරෝධතාවයක නිරත වූහ.

මෙම රෝහල ප්‍රාදේශීය රෝහලක් වන අතර ප්‍රාදේශිය රෝහලකට ඇති පහසුකම් තමන්ට නැති බව විරෝධතාකරුවෝ පැවසූහ. දැනට දෛනිකව බාහිර රෝගි අංශයෙන් ප්‍රථිකාර ලබාදෙන අතර වාට්ටුවක් ඇතත් නේවාසිකව රෝගින්ට ප්‍රතිකාර නොකරන බව විරෝධතාකරුවෝ සඳහන් කළහ.

දැනට මාස කිහිපයකය පෙර ගැබිනි මාතාවන් සඳහා වාට්ටුවක් විවෘත කර ඇති අතර එය විවෘත කළ දිනයේ සිට වසා දමා තිබෙන බව ගම්වැසියෝ පැවසූහ.දැනට සිටින කාර්ය මණ්ඩලය නිසි වේලාවට සේවයට වාර්තා නොකිරීම නිසා බෙහෙත් ගැනීමට පැමිණෙන රෝගින් අපහසුතාවයට පත්වෙන බවද ඔවුහු කියති.

මෙම විරෝධතාවය සමඟ මෙම ස්ථානයට කල්මුණේ නියෝජ්‍ය සෞඛ්‍ය සේවා අධ්‍යක්ෂක කාර්යාලයේ නිලධාරීන් පැමිණ ගම්වැසියන් සමඟ විශේෂ සාකච්ඡාවක් පවත්වනු  ලැබීය.

එහිදී කඩිනමින් පැය 24 තුළම සේවාව අද දින (27) සිටම ලබාදීමට පියවර ගන්නා බව එම නිලධාරීහු ගම්වැසියන්ට පොරොන්දු වූහ. මෙම ස්ථානයේ ඇති අඩුපාඩු ඉදිරි දින කිහිපය තුළදී ඉටු කරදීමට ගැම්වැසියන්ට පොරොන්දු වී තිබේ.

නියෝජ්‍ය සෞඛ්‍ය සේවා කාර්යාලයේ නිලධාරීන් දුන් පොරොන්දු කෙරෙහි විශ්වාශ්‍ය තැබූ ගම්වැසියෝ විරෝධතාවය අවසන් කරනු ලැබූහ.