(ඔගස්ටින් ප්‍රනාන්දු)            

පුත්තලම පැරණි මන්නාරම මාර්ගයේදී ට්‍රැක්ටර් රථයක් අනතුරකට ලක්වී එහි ගමන් ගත් 13 දෙනෙකු තුවාල ලබා රෝහල් ගත කර ඇති බවත් එහි ගමන් ගත් එක් අයෙකු මියගොස් ඇති බවත් වනාතවිල්ලුව පොලිසිය පැවසීය.

බරපතල තුවාල ලැබූ පිරිස පුත්තලම මූලික රෝහලට ඇතුළත් කර ඇති බව පොලිසිය කීය.

අනතුරින් මියගොස් ඇත්තේ එරච්චිකුලම් විල්ලුව කිරතිව් දකුණ ප්‍රදේශයේ පදිංචිව සිටි වනසිංහ ආරච්චිලාගේ ජානක  නමැති 52 හැවිරිදි පුද්ගලයෙකි.

වනාතවිල්ලුව ප්‍රදේශයේ කජු වගා බිමක සේවය කරන කම්කරුන් පිරිසක් ඊයේ (28) සවස සේවය නිමා කර නිවෙස් වෙත ගමන් කරමින් සිටියදී මෙම අනතුර සිදුවී ඇති බව පොලිසිය පැවසීය.

ට්‍රැක්ටර් රථයේ වේගය පාලනය කරගැනීමට නොහැකිවී ටේලරය කොටස ගැලවී පෙරළීයාමෙන් මෙම අනතුර සිදුවී ඇතැයි පොලිසිය පැවසීය.

ට්‍රැක්ටර් රථයේ රියදුරා අත්අඩංගුවට ගෙන ඇති බව පොලිසිය පැවසීය.