(මොහොමඩ් ආසික්)

ජනතා විමුක්ති පෙරමුණ සහ දෙමළ ජාතික සන්ධානය සමඟ මැතිවරණයක් සඳහා සන්ධාන ගතවීමේ කිසිඳු  සාකච්ඡාවක්වත්  පවත්වා නොමැති බව ශ්‍රී ලංකා මුස්ලිම් කෝන්ග්‍රසයේ නායක පාර්ලිමේන්තු මන්ත්‍රී රවුෆ් හකීම් මහතා අද (24) පැවසීය.

මහනුවර අද පැවැති මෙම මාධ්‍ය හමුවේදී  මේ සම්බන්ධයෙන් අදහස් දැක් වූ රවුෆ් හකීම් මහතා මෙසේද සඳහන් කළේය.

      ‘‘මම අද මේ මාධ්‍ය සාකච්ඡාව කැදෙව්වේ විශේෂයෙන් අපේ වාර්ෂික නියෝජිත සමුළුවේදී කළ කතාවක කොටසක මම  කිව්ව කාරණාවන් සම්බන්ධයෙන් වැරදි අවබෝධයක් ඇති වෙලා තියෙනවා. ඒ පිළිබඳව පැහැදිලි කිරීමක් කළ යුතුයි.

සුළු සහ සුළු ජාතින් නියෝජනය කරන පක්ෂ එක් වී පුළුල් සන්ධානයක් හරහා ප්‍රජාතන්ත්‍ර විරෝධී කටයුතුවලට  එරෙහිව අපි එක වේදිකාවක් සෑදීමේ වුවමනාවක් සහ සූදානමක් තිබෙන බව කියා සිටියා.

ඒකෙන් මා කිසි විටෙක අදහස් කළේ නෑ.  අපි මැතිවරණයක් සඳහා වූ සන්ධානයකට ලැස්ති වෙනවා කියන අදහසක්.  එහෙම අදහසකින් මම කිසිවිටෙක එම ප්‍රකාශය සිදු කළේ නැති බව මම පැහැදිලිව ප්‍රකාශ කරන්න ඕන.  

කවුරුත් දන්නා විදිහට ජනතා විමුක්ති පෙරමුණ සහ දෙමළ ජාතික සන්ධානය ශ්‍රී ලංකා මුස්ලිම් කෝන්ග්‍රසය විවිධාකාරයේ වෙනස්  ප්‍රතිපත්ත අනුගමනය කරන පක්ෂ හැටියට  අපිට එවන් පුළුල් සන්ධානයකට එකතුවීම ඉතා අසීරු කාරණයක්.

ඇත්තටම මම අදහස් කළේ  සුළු පක්ෂවලටත් සුළු ජාතින් නියෝජනය කරන පක්ෂවලටත් අභියෝගයට තුඩු දුන්න කාරණා කිහිපයක් තිබෙනවා. ප්‍රජාතාන්ත්‍ර විරෝධී ලෙස එවන් කාරණා ඇති වීම වළක්වා ගැනීම සඳහා අපි අවම න්‍යාය පත්‍රයක් උඩ එකතු වීමක් පිළිබඳවයි මම කතා කළේ.  

ඒ පිළිබඳව පූර්ව සාකච්ඡා කිහිපයක් අපි නායකයින් අතරේ සිදු වී තිබුණත් තවම නිගමනයකට එළඹිලා නැති බවත් කියන්න ඕන .කිසිවිටෙක ජනතා විමුක්ති පෙරමුණ දෙමළ ජාතික සන්ධානය වැනි පක්ෂ සමඟ ශ්‍රී ලංකා මුස්ලිම් කෝන්ග්‍රසය මැතිවරණයක් ඉලක්ක කර ගනිමින්  සන්ධාන ගතවීමක් අදහස් කළේ නෑ කියන එක පැහැදිලිව කියා සිටිනවා. ඒක විශාල කැළඹීමක් ඇති වෙලා තියෙනවා අපි දැක්කා ජවිපෙ සමහර මන්ත්‍රීවරු මෙ විවේචනය කර  අදහස් ප්‍රකාශ කර තිබුණා.

එක්සත් ජාතික පක්ෂය වැනි ප්‍රධාන පක්ෂ පැත්තක තියලා මේ වගේ එකමුතුවකට එන්න හදනවා කියල කිව්ව එක ගැනත් වැරැදි අවබෝධයක් ඇති වෙලා තියෙනවා.මම පැහැදිලිව කියන්න ඕන සජිත් ප්‍රේමදාස මැතිතුමාගේ නායකත්වයෙන් එජාපයත් සමඟ ඇති වන පුළුල් සන්ධානයත් සමඟ එකතු වීමේ සූදානමක් තිබෙනවා.

එහි ශ්‍රී ලංකා මුස්ලිම් කෝන්ග්‍රසයත් කොටස්කාර පක්ෂයක් ලෙස තරඟ කිරීමට සූදානමින් ඉන්නවා. මම මහනුවර දිස්ත්‍රික්කයෙන් සජිත් ප්‍රේමදාස මහතා සමඟ එකතු වන පුළුල් සන්ධානයෙන් තරඟ කරන්න අදහස් කරනවා.

මම නියෝජිත සමුළුවේ කළ කරුණු නොයෙකුත් නාලිකාවල විකාශනය වෙද්දී ජනතාව වැරදි විදිහට අවබෝධ කර ගන්න ඉඩ තියෙන බව පෙනී ගිහින් තියෙනවා.‘‘යැයිද කීය.