(පුෂ්පකුමාර මල්ලවආරච්චි)

විදේශීය රටවල නිෂ්පාදිත ගිනි අවි තුනක් හා දේශීයව එකලස් කළ බවට සැලකෙන ගිනි අවියක් බලපත්‍ර නැතිව සන්තකයේ තබාගැනීම සම්බන්ධයෙන් වතු මුරකරුවකු  ගම්පහ කොට්ඨාස නීතිය බලගැන්වීමේ ඒකකය මගින් අද (09) සවස අත්අඩංගුවට ගෙන මීරිගම පොලිස් ස්ථානයට බාරදෙනු ලැබීය.

ගම්පහ කොට්ඨාස නීතිය බල ගැන්වීමේ ඒකකයේ  ස්ථානාධිපතිවරයාට ලද  තොරතුරක් අනුව  මීරිගම මදුරුපිටිය, ලෝලුවාගොඩ ප්‍රදේශයේ  පිහිටි අක්කර 60 ක් පමණ විශාල වත්තක මුරකරු සන්තකයේ තිබී මෙම බලපත්‍ර නොමැති   ගිනි අවි 4  අත්අඩංගුවට ගැනීමට හැකිවී ඇත.

මෙසේ අත්අඩංගුවට ගෙන ඇත්තේ  විදේශිය රටක නිෂ්පාදිත රිපීටර් වර්ගයේ ගිනි අවියක්, බෝර 12 වර්ගයේ පතරොම් තුවක්කුවක්, විදේශීය රටක නිෂ්පාදිත මැෂින් කොටස හා බැරලය සහිත බද කොටස නොමැති ගිනි අවියක් හා මෙරට නිෂ්පාදිත ගල්කටස් වර්ගයේ ගිනිඅවියකි.

මෙම ගිනි අවි අගල් අටක් පමණ විෂ්කම්භය ඇති ප්ලාස්ටික් බටයක අසුරා දෙපසට මූඩි සවිකර ආරක්ෂිතව තබා තිබූ බවද පොලිසිය සඳහන් කරයි.

මෙම ගිනි අවි වන සතුන් දඩයම් කිරීම සඳහා යොදා ගත්තාද නැතහොත් කිසියම් අපරාධයක් කිරීම සඳහා යොදාගෙන ඇතැයිද හෙළිකර ගැනීමට පරීක්ෂණ පැවැත්වේ.