(ඔගස්ටින් ප්‍රනාන්දු)   

බංගදෙණිය කුමාරකට්ටුව එලිවිටිය ප්‍රදේශයේ නිවසක් පිටුපස සඟවා ගෙන සිටි ඉත්තෑවුන්  5දෙනෙකු සමග පුද්ගලයෙකු අද (25) පස්වරුවේ  අත්අඩංගුවට ගත් බව හලාවත කොට්ඨාස විෂ මත්ද්‍රව්‍ය නිවාරණ ඒකකය කියයි.

හදිසියේ ලද තොරතුරක් මත ගොස් එම නිවස පරික්ෂා කළ අවස්ථාවේදී නිවස පිටුපස ඉදිකර තිබූ ටැංකියක් තුළ දමා සිටි මෙම ඉත්තෑවුන්ට විශාල ප්‍රමාණයේ ඉත්තෑවුන් 4 දෙනෙකුද කුඩා පැටවෙකුද අයත් වූ බවත් කියයි.
 
වනජීවි ආඥා පනත අනුව ඉත්තෑවුන් සන්තකයේ තබා ගැනීම නීතිවිරෝධී කටයුත්තකි. එසේ තිබියදී වන ජීවි අධ්‍යක්ෂවරයාගෙන් ලබා ගත් නිසි අවසර පත්‍රයකින් තොරව මෙම ඉත්තෑවුන් සන්තකයේ තබාගෙන සිටීමේ චෝදනාව මත නිවසේ හිමිකරුව අත්අඩංගුවට ගෙන ඇති බවත් කියයි.
 
තමන් හුරතලයට මෙම සතුන් ඇති දැඩි කළ බව සැකකරු පවසා ඇත. ඔහු දෙමටපිටිය එළිවිටිය ප්‍රදේශයේ පදිංචි 60 වන වියේ පසුවන අයෙකු බවත් කියයි.

සැකකරු හා ඉත්තෑවුන් හෙට (26) හලාවත අධිකරණය හමුවට ඉදිරිපත් කරන අතර වැඩිදුර පරික්ෂණ සිදු කෙරේ.