(මොහොමඩ් ආසික්)
 
කටුගස්තොට පොලිස් බල ප්‍රදේශයට අයත් අලදෙණියේ රජයේ රක්ෂිතයට ලොරි රථයකින්  නරක් වූ කරවල  ඇතුළු අපද්‍රව්‍ය තොගයක් බැහැර කළ පුද්ගලයින් දෙදෙනෙකු ප්‍රදේශවාසීන් අල්ලා පොලීසියට බාරදුන් පසු අත්අඩංගුවට ගත් බව කටුගස්තොට පොලිසිය කියයි.
 
අත්අඩංගුවට ගත් දෙදෙනා දවුලගල ප්‍රදේශයේ පදිංචිකරුවන් බවද පොලීසිය කියයි.
 
මෙම ස්ථානයට  ඇතැම් පිරිස් වාහනවලින් කසළ ගෙනවිත් දැමීම  නිරන්තරයෙන් සිදු වන බැවින් ප්‍රදේශයේ ජනතාව රාත්‍රී කාලයේ අවදියෙන් සිට මේ සම්බන්ධයෙන් නිරීක්ෂණය කර තිබේ.
 
අද (15)  අලුයම කුඩා ලොරි රථයකින් මෙලෙස කසළ  ගෙනවිත් දමා ඇති අතර එම අවස්ථාවේ  පිරිස ඔවුන් අල්ලා පොලීසියට භාර දී ඇත.
 
කරවල වෙළඳාමේ යෙදෙන  දෙදෙනෙකු මෙම රක්ෂිත  භූමියට අපද්‍රව්‍ය  බැහැර කර ඇති බව අනාවරණය වී තිබේ.
 
මෙම පුද්ගලයින් දෙදෙනා  පොලීසිය අත්අඩංගුවට ගෙන ඇති අතර ඔවුන් මහනුවර මහේස්ත්‍රාත් අධිකරණය වෙත ඉදිරිපත් කිරීමට නියමිතය.