අරුවක්කාලුවට කසළ ගෙන ගිය ටිපර් රථ 2ක් ගැටේ

(හිරාන් ප්‍රියංකර ජයසිංහ සහ එච්.චන්දන)

අරුවක්කාලු කසළ අංගනයට කසළ ප්‍රවාහනය කරමින් තිබු ටිපර් රථ දෙකක් අද(9) අලුයම පුත්තලම කොළඹ ප්‍රධාන මාර්ගයේ මදුරන්කුලිය කරිකට්ටිය ප්‍රදේශයේදී එකිනෙක ගැටීමෙන් එක් රථයකට බරපතල හානි සිදුව ඇති බව මුන්දලම පොලිසිය පවසයි.

කොළඹ සිට අරුවක්කාලු දක්වා කසළ ප්‍රවාහනය කරමින් තිබු ටිපර් රථයක් හදිසියේ තිරිංග තද කිරීමත් සමග පසුපසින් පැමිණි ටිපර් රථයේ ගැටීමෙන් අනතුර සිදුව ඇත.

මුන්දලම පොලිසිය අනතරට පත් ටිපර් රථය දොඹකර ලොරි රථ ආධාරයෙන් මුන්දලම පොලිසිය වෙත රැගෙන ගොස් ඇත.

කොළඹ සිට අරුවක්කාලු දක්වා කසළ ප්‍රවාහනය කරමින් තිබු ටිපර් රථ අනතුරට ලක්වු තුන්වන අවස්ථාව මෙය බවද පොලිසිය කියයි.

රියදුරා පමණක් ටිපර් රථයේ සිටීමත්, ඇතැම් රියදුරන් පැය හතරකට ආසන්න කාලයක් කිලෝ මිටර් 150 කට වැඩිදුරක් ධාවනය කිරීමත්, අධික නිදිමත හා වෙහෙසත් මෙම අනතුරට හේතු විය හැකි බව පොලිස් නිලධාරීහු පෙන්වා දෙති.