(නවරත්න සමරතුංග)

අතුරුදන් ව සිටි කාන්තාවකගේ මළ සිරුරක් ඇය පදිංචිව සිටි නිවස පිටුපස වළ දමා තිබියදී අද (12)  සොයාගත් බව තිරුක්කෝවිල පොලීසිය කියයි. 

මියගොස් ඇත්තේ විනයාගපුරම්, තිරුක්කෝවිල පදිංචිව සිටි ලෙච්චමී සනහම් හෙවත් මලර් නැමති 52 හැවිරිදි කාන්තාවක බවට හඳුනා ගෙන ඇත. 

සිද්ධිය වූ 10 වන දින ඇගේ සැමියා කුඹුරට ගිය අවස්ථාවේ මෙම කාන්තාව සහ ඇගේ දියණියගේ දරුවාද සමග නිවසේ සිට ඇත. 

මෙම කාන්තාව දහවල් අසළ කඩයකට ගොස් පැමිණෙමින් සිටි බවට පොලීසිය තොරතුරු අනාවරණය කරගෙන ඇත. මෙදින දහවල් කුඹුරේ සිට නිවසට පැමිණ ඇති ඇයගේ සැමියා සවස් වනතුරු ඇය නොපැමිණි බැවින් දියණියට සහ බෑණාට දැනුම්දී තිරුක්කෝවිල පොලීසියට පැමිණිලි කර ඇත. පොලීසිය කළ මූලික පරීක්ෂණයේදී කිසිදු හෝඩුවාවක් දැන ගන්නට ලැබී නැත. 

විමර්ශන නිලධාරීන් පරීක්ෂා කරනවිට නිවස පිටුපස අඩක් වැඩ නිමකර තිබූ නාන කාමරයක් අසලින් දැඩි දුඟඳක් වහනය වූ බවත්, එම ස්ථානයේ වළ දමා තිබී මළසිරුර සොයාගත් බවත් පොලිසිය කියයි.

අක්කරපත්තු අධිකරණයට කරුණු වාර්තා කළ පොලීසිය අධිකරණ නියමය මත අධිකරන වෛද්‍ය නිලධාරියාගේ අධීක්ෂණය මත මෘත දේහය ගොඩ ගැනීමට  පියවර ගෙන තිබිණ.

මෙය මිනීමැරුමක් බව පොලීසිය පවසයි.

සැකකරුවන් අත්අඩංගුව ගැනීමට විමර්ශන පවත්වන බව පොලිසිය කියයි.