(කතරගම එම්.කේ. නන්දසේන)

අග්‍රාමාත්‍ය රනිල් වික්‍රමසිංහ මහතා කතරගම උත්සවයකට පැමිණි හෙලිකොප්ටර් යානයේ සුළං පහරට මැණික් ගඟ ඉවුරේ ගසක අත්තක් කඩා වැටී මැණික්ගඟේ දියනාමින් සිටි පිරිමියෙකු සහ කාන්තාවක තුවාල ලබා අද (03දා) පෙරවරු 8.30 ට පමණ කතරගම දිසා රෝහල වෙත ඇතුලත් කෙරිණි.

මෙසේ තුවාල ලබා රෝහල් ගතකලේ මාතර ප්‍රදේශයේ සිට වන්දනාවේ පැමිණ දියනාමින් සිටි ජී.එල්.ඒ.ජගත්සිරි (53) සහ ගාල්ල පෙරුමගේ කරුණාසීලි (64) නැමති දෙදෙනාය.

රුපියල් ලක්ෂ 745 ක වියදමින් අභිනවයෙන් ඉදිකල කතරගම ප්‍රාදේශීය ලේකම් කාර්යාලය අද (03) පෙරවරු 9.00 ට විවෘත කිරිමට නියමිතව තිබුණේ අග්‍රාමාත්‍ය රනිල් වික්‍රමසිංහ මහතාගේ ප්‍රධානත්වයෙනි.

කතරගම ගංගාරාම විශ්‍රාමශාලාව අසල ගුවන් අංගනයට අග්‍රාමාත්‍යවරයා බස්සවා නැවත ඉන්ධන ලබාගැනීම සඳහා ගුවන් ගතකරන අතරවාරයේ ගඟ ඉවුරේ තිබු ගසක අත්තක් මෙලෙස කඩා වැටී ඇතිබව කියයි.

කතරගම පොලිසිය මෙිපිළිබදව පරීක්ෂණ පවත්වයි.