( කාංචන කුමාර ආරියදාස)

අධිකරණ නියෝගයකින් වෙන්දේසි වූ සිප්පිකටු තොඟයක් කුලියාපිටියට ප්‍රවාහනය කිරීමේදී දඹුල්ල පොලිස් බල ප්‍රදේශය පසු කරද්දී එහි අධිකරණ නියෝගයට වඩා කිලෝ 6680 ක් වැඩිපුර ප්‍රවාහනය කිරීමේ චෝදනාව යටතේ පුද්ගලයන් දෙදෙනෙකු ලොරි රථයක් සමඟ සැකපිට දඹුල්ල පොලීසිය අත්අඩංගුවට ගෙන තිබේ.

මීට මාස කිහිපයකට ඉහතදී බලපත්‍ර කිසිවක් නොමැතිව මුහුදු වැලි සමඟ ලබාගන්නා කුකුල් ආහාර වලට යොදා ගන්නා සිප්පිකටු තොගයක් කන්තලේ පොලිසිය මගින් සැකපිට අත්අඩංගුවට ගෙන කන්තලේ  මහෙස්ත්‍රාත් අධිකරණයට ඉදිරිපත් කොට තිබිණි 

ඒවා මහේස්ත්‍රාත් අධිකරණ නියෝගයක් පරිදි රාජසන්තක කිරීමෙන් පසු පසුගියදා වෙන්දේසි  කර ඇත. එම වෙන්දේසියේදී  සිප්පිකටු  තොගය  ව්‍යාපාරිකයෙකු විසින් ලබාගෙන කුලියාපිටිය ප්‍රදේශයේ කුකුල් ගොවිපලක් වෙත ප්‍රවාහනය කර තිබේ.

දඹුල්ල මුලස්ථාන පොලිස් පරීක්ෂක සම්පත් වික්‍රමරත්න මහතාට ලැබුණු තොරතුර කියැවී ඇත්තේ අධිකරණ නියෝගය සහ  පතල් හා ඛනිජ ද්‍රව්‍ය පනතත් ධීවර හා ජලජ සම්පත් පනත උල්ලංඝණය කරමින් මෙම ලොරි රථයේ සිප්පිකටු   බලපත්‍රයේ ඇති ප්‍රමාණයට වඩා  කිලෝ අට දහස් හයසිය අසූවක් වැඩිපුර ප්‍රවාහනය කරන බවය.

ඒ අනුව අත්අඩංගුවට ගෙන පරික්ෂා කිරීමේදී මෙම ලොරි රථයේ සිප්පිකටු මලු 450ක ඇසුරුම් කර කිලෝ 31180 ක් තිබුණු බවත් ඒ සඳහා පතල් හා ඛනිජ ද්‍රව්‍ය ප්‍රවාහන බලපත්‍රය හිමිව ඇත්තේ කිලෝ 22500කට  බව දඹුල්ල මුලස්ථාන පොලිස් පරීක්ෂක සම්පත් වික්‍රමරත්න මහතා පැවසීය.