මුදිතා දයානන්ද                                                             
       

ශ‍්‍රී ලංකා නිදහස් පක්ෂයෙන් ඒකාබද්ධයට එකතු වුණ 16 දෙනා ආවේ අපිව අවුල් කරන්න කියලා කවුරුහරි කියනවා නම් එය දේශපාලනය හරියට තෝරගන්නේ නැතිව කළ ප‍්‍රකාශයක් යැයි පිවිතුරු හෙළ උරුමයේ නායක පාර්ලිමේන්තු මන්ත‍්‍රී උදය ගම්මන්පිල මහතා අද (18) පැවසීය.
       

ගම්මන්පිල මහතා මේ බව පැවසූයේ පිටකෝට්ටේ පිහිටි පිවිතුරු හෙළ උරුමය කාර්යාලයේ දී පැවති මාධ්‍ය හමුවකදී ආණ්ඩුවෙන් ඉවත්ව ඒකාබද්ධය සමඟ එක්වු 16 දෙනා සම්බන්ධයෙන් ඒකාබද්ධ විපක්ෂය තුළ මතභේද හටගෙන තිබීම සම්බන්ධයෙන් මාධ්‍යවේදියකු නැගූ ප‍්‍රශ්නයකට පිළිතුරු සපයමින් වන අතර ඔහු තවදුරටත් මෙසේද පැවසීය.
       

මේ වගේ එකවර ආණ්ඩුවක් අත්ඇරලා විපක්ෂයට 16ක් ආවාම වෙන රටක නම් මල්මාලා දාලා පිළිගන්නේ. දේශපාලනය හරියට තෝරාගන්න බැරි අය තමයි ඔවුන්ට විරුද්ධ වෙන්නේ. මේ ආණ්ඩුව ගෙදර යවන්න නම් පාර්ලිමේන්තුව තුළ අපේ අරගලය සාර්ථක කරගන්න අපිට 113ක් අවශ්‍යයි. මේ දාසයත් සමඟ තවත් පහක්වත් හිටියා නම් හොඳයි. මේක දාසය පිළිගන්න ආකාරය අනුව තමයි ඉතිරි අය එන්නේ. අපේ අය මේක දැගන්න  ඕනෑ.


මේ 16 ඇවිත් තිබෙන්නේ ඒකාබද්ධය අවුල් කරන්න යැයි ඒකාබද්ධයේ ප‍්‍රධාන චරිතයක් වන කුමාර වෙල්ගම මහතා වගේම ප‍්‍රසන්න රණතුංග මහතාත් දක්වන අදහස සම්බන්ධයෙන් අදහස් දැක්වූ ගම්මන්පිල මහතා මෙසේ පැවසීය.
       

ඒ දාසය දෙනාට අපේ කණ්ඩායම අවුල් කරන්න පුළුවන් කියලා කවුරු හරි කියනවා නම් එයින් කියවෙන්නේ අපි කණ්ඩායමේ තිබෙන දුර්වල කමයි. අපි දීර්ඝ කාලයක් දේශපාලනය කරලා අත්දැකීම් ඇති පිරිසක්. පරණ තරහවල් හිතේ තියාගෙන හිටියොත් අපිට ඉදිරියට යන්න බැහැ. ඒ නිසා ඒ සියල්ල පසෙක දමා ඉදිරියට ආවොත් පමණයි අපිට ජයග‍්‍රහණයක් තිබෙන්නේ.