(සිරාජ් හසීම්)

දෙමළ ජාතික සන්ධානයේ නායක ආර්.සම්බන්ධන් මහතා විපක්ෂනායක ධූරයේ සිටීමට නුසුදුසු බව ඊ.පී.ආර්.එල්.එෆ් පක්ෂයේ නායක හිටපු පාර්ලිමේන්තු මන්ත්‍රී සුරේෂ් ප්‍රේමචන්ද්‍රන් මහතා පවසයි.

ජාතික ගැටළුව ඇතුළු දෙමළ ජනතාවගේ මූලික ගැටළුවලට විසදුම් ගෙන දීමට අපොහොසත් වී ඇති මොහොතක සම්බන්ධන් මහතා විපක්ෂනායක ධූරයෙන් ඉවත් විය යුතු බවද හෙතෙම කියා සිටියේය.

රටේ වත්මන් දේශපාලන තත්වය සම්බන්ධයෙන් මාධ්‍යට අදහස් දක්වමින් ප්‍රේමචන්ද්‍රන් මහතා මේ අදහස් පලකර සිටියේය.

සම්බන්ධන් මහතා විපක්ෂ නායක ධූරයෙන් ඉවත් වූයේ නම් මෛත්‍රී රනිල් ආණ්ඩුවට දැඩි බලපෑමක් එල්ල කල හැකි බවත් ඔහු මේ ධූරයේ සිටින තාක් දෙමළ ජනතාවගේ අර්බුධ වෙනුවෙන් රජයට බලපෑමක් එල්ල කළ  නොහැකි බවත් හෙතෙම කියා සිටියේය.

එමෙන්ම උතුරු මහ ඇමති සී.වී.විග්නේෂ්වරන්ගේ නායකත්වය මත නව දේශපාලන බලවේගයක් ආරම්භ කරන්නේ නම් ඊ.පී.ආර්.එල්.එෆ් පක්ෂයේ සහායද ඊට හිමිවනු ඇති බවත් මහ ඇමතිවරයාගේ ක්‍රියා කලාපය මත එය තීරණය වනු ඇති බවත් ප්‍රේමචන්ද්‍රන් මහතා කියා සිටියේය.