(නාලක සංජීව දහනායක)
 
අසීරු අවස්ථාවල මැතිවරණ ජයග්‍රහණය කළ තම පක්‍ෂයට මහ මැතිවරණයෙන් අතිවිශිෂ්ඨ ජයක් ලබාගැනීම අසීරු කාරණයක් නොවන බව ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්‍ෂ මහතා පැවැසීය.
 
එබැවින් සන්ධානයේ අනෙකුත් පක්‍ෂ සමඟ සහයෝගයෙන් කටයුතු කර පක්‍ෂයට 2/3 බලයක් ලබාගැනීමට සියළුම දෙනා කටයුතු කළ යුතු බවද ඔහු කීය.
 
බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණු ප්‍රධාන කාර්යාලයේදී පක්‍ෂ ක්‍රියාකාරීන් සමඟ පසුගියදා පැවැති සාකච්ඡාවකදී හෙතෙම මේ බව සදහන් කළේය.
 
 මහ මැතිවරණ මෙහෙයුම් කටයුතු සිදුකළ යුතු ආකාරය, එහිදී පක්‍ෂ ක්‍රියාකාරීන් මුහුණදෙන ගැටළු සහ ප්‍රාදේශීය වශයෙන් ඇතිව තිබෙන ගැටළු පිළිබඳව එහිදී දීර්ඝ වශයෙන් සාකච්ඡා කළහ.

එහිදී වැඩිදුරටත් අදහස් දැක්වූ බැසිල් රාජපක්‍ෂ මහතා සදහන් කර සිටියේ පක්‍ෂ නායකත්වය පවා නිල වශයෙන් ප්‍රකාශ කළ නොහැකි අවස්තාවක පළාත් පාලන මැතිවරණයට ඉදිරිපත්ව ජයග්‍රහණය කළ තම පක්‍ෂයට මහ මැතිවරණය ජයග්‍රහණය කිරීමේ කිසිඳු අභියෝගයක් නොමැති බවය. සියළුම දෙනා මැතිවරණ නීති රීතිවලට අනුව මැතිවරණ මෙහෙයුම් කටයුතු කළ යුතු බවත් ප්‍රචාරණ කටයුතු පරිසර හිතකාමීව සිදුකළ යුතු බවත් කී බැසිල් රාජපක්‍ෂ මහතා සිංහල හා හින්දු අලුත් අවුරුදු සමයේදී සාමාන්‍ය ජන ජිවිතයට බාධා ඇති නොවන ආකාරයට සියලු කටයුතු සිදුකළ යුතු බවද අවධාරණය කළේය.