(*** මෝදර සී. ඉග්නේෂස් ඇන්තනි)

‘‘වර්තමාන පාලකයන්ට ජනතාව තුනෙන් දෙකක බලයක් ලබාදුන්නේ පරිසරය ආරක්ෂා කිරීමට මිස විනාශ කිරීමට නොවේ යැයි’’ සමගි ජනබලවේගය නායක, විපක්ෂ නායක සජිත් ප්‍රේමදාස මහතා උතුරු කොළඹදී ප්‍රකාශ කළේය.

‘‘පසුගිය මැතිවරණයේදී සමගි ජන බලවේගය වෙනුවෙන් ජන්දය ප්‍රකාශ කළ ජනතාවට තුති පිදීම සඳහා උතුරු කොළඹ පැමිණි විපක්ෂ නායකවරයා එසේ පැවැසුවේ, උතුරු කොළඹ සමගි ජන බලවේගය ප්‍රධාන කාර්යාලයේ පැවැති ජනහමුවේදීය.

සමගි ජන බලවේගය උතුරු කොළඹ ප්‍රධාන සංවිධායක සී.පී.වයි. රාම් මහතා විසින් මෙම ජනහමුව සංවිධානය කර තිබිණි.

මෙහිදී කාන්තාවන්ගේ ආර්ථිකය නංවාලීම පිණිස ස්වයං රැකියා සඳහා ණය ආධාර ප්‍රදානයක්  හා පාසල් සිසු සිසුවියන් සඳහා අභ්‍යාස පොත් ඇතුළු උපකරණ බෙදාදීමක් සිදුකෙරිණි.
පාසල් සිසු සිසුවියන් 200 කට අධික පිරීසකට මෙම උපකරණ බෙදාදීම විපක්‍ෂ නායකවරයා අතින් සිදුවිය.

ජනහමුව අමතමින් විපක්ෂ නායක සජිත් ප්‍රේමදාස මහතා මෙසේද කීවේය.

‘‘සමගි ජන බලවේගය දිනවීම සඳහා අප වෙනුවෙන් ඇප කැපවී ඡන්දය දුන් සියලු දෙනාටත් මේ ජනහමුව සංවිධානය කළ සී.පී.වයි. රාම් මහතාටත් මගේ අවංක ස්තූතිය පුදකර සිටිනවා.
උතුරු කොළඹ මෙතෙක් බලය රැකගෙන සිටි එජාපයට තිත තබා අපට මෙම ප්‍රදේශයේ ජනතාව 41000 කට වැඩි ඡන්ද ප්‍රමාණය දුන්නා. එය මා අගය කරනවා.

ඉදිරියේදී සමගි ජනබලවේගයේ ඉදිරි ගමන යාමට උතුරු කොළඹ ජනතාව අපත් සමග අත්වැල් බැඳගනීවියි කියා මා සිතනවා. උතුරු කොළඹ සංවර්ධනය කිරීමට එය රුකුලක් වෙනවා. මා කිසි විටෙකත් මේ ජනතාව අමතක කරන්නේ නැහැ.

ප්‍රදේශයේ අඩු ආදායම්ලාභී පවුල්වල සිටින කාන්තාවන්ගේ අතමිට සරුකිරීම සඳහා ස්වයංරැකියා පිණිස අවශ්‍ය මුදල් ආධාර දෙන්න අප සූදානම්. ඒ සඳහා මගේ බිරිඳ ජලනී ප්‍රේමදාස මහත්මිය ලක ලෑස්තිව ඉන්නවා.

රට බාරගන්න ඉන්න දරුවන්ගේ අනාගතය යහපත් කරන්න ඕනෑ. ඒ සඳහා තිරසර සංවර්ධනයක් අවශ්‍යයි. එසේ වුවත් තිරසර සංවර්ධනයක් රටේ ඇතිවෙයි කියා අපට හිතාගන්න බැහැ.
රටේ ජනතාව මේ රජයට තුනෙන් දෙකක බලයක් දුන්නා. බලය ලැබුණත් එක්කම ඔවුන් පරිසරය විනාශ කරන්නට පටන්ගෙන තිබෙනවා.

මේ වනවිට පුත්තලමේ සහ සිංහරාජ අඩවියේ භූමි කොටස් ඩෝසර් කරමින් යනවා. එයින් පරිසරය විනාශ වෙනවා. පාලන බලය අතට ගත් පාලකයන් මේ දින කිහිපය තුළ කරන්නාවූ පරිසර විනාශය දෙස අපට බලාගෙන ඉන්න බැහැ. මෙය වහාම නැවැත්විය යුතුයි. අපි ඒ සඳහා පියවර ගන්නවා.

ජනතාව ඔවුන්ට තුනෙන් දෙකක බලයක් දුන්නේ පරිසරය විනාශ කරන්න නොවෙයි, පරිසරය රැකගෙන තිරසර සංවර්ධනයක් ඇතිකරන්නයි. රට සුරක්ෂිත කිරීමට කැපවෙනවා.’’
මෙම අවස්ථාවට විපක්ෂ නායකවරයාගේ බිරිඳ වූ ජලනි ප්‍රේමදාස මහත්මියද සහභාගී වූවාය.