(අංජුල මහික වීරරත්න)
 
ආර්ථිකයක් දියුණුවීමට නම් ඒ සඳහා කාන්තා සහභාගීත්වය අනිවාර්ය බව අග්‍රාමාත්‍ය රනිල් වික්‍රමසිංහ මහතා අරලියගහ මන්දිරයේදී අද(26) පැවැසීය.
 
පළාත් සභාවල සහ ප්‍රාදේශීය සභාවල කාන්තා නියෝජනය නිසි පරිදි තිබේනම් පාර්ලිමේන්තුවටත් එම නියෝජනය තෝරාගැනීම අසීරු කටයුත්තක් නොවන බව කී ආග්‍රාමාත්‍යවරයා බොහෝ විරෝධතා නොතකා කාන්තා නියෝජන පනත සම්මත කරගැනීමට තමා ඇතුළු මන්ත්‍රී කණ්ඩායමට හැකියාව ලැබුණු බවද සඳහන් කළේය.
 
අග්‍රාමාත්‍ය රනිල් වික්‍රමසිංහ මහතා මේ බව පැවසුවේ ධනාභිමානී කාන්තා සම්මේලනයේ ප්‍රධාන ආරාධිතයා ලෙස සහභාගී වෙමිනි.
 
සමෘද්ධි සංවර්ධන දෙපාර්තමේන්තුව සහ ප්‍රාථමික කර්මාන්ත සහ සමාජ සවිබලගැන්වීමේ අමාත්‍යාංශය එක්ව මෙම සම්මේලනය සංවිධානය කළේය.
 
‘සමෘද්ධිමත් මෙහෙවරකට - ලක්වනිතාවන්ගේ හෙට දිවියට’ යන තේමාවෙන් මෙම සම්මේලනය සංවිධානය කර තිබිණි.

ඡායාරූප  - ශාන්ත රත්නායක