(ඉන්දිකා රාමනායක)

වයඹ පළාතේ ඉකුත් දා සිදු වූ ප‍්‍රචණ්ඩ ක්‍රියාවලට  සම්බන්ධ සැකකරුවන් 78 දෙනෙකු  අද (15) වනවිට අත්අඩංගුවට ගෙන ඇති බව පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා  පැවසීය.

මින් පුද්ගලයන් 62 දෙදෙනෙකු  13 සහ 14 යන දිනයන් වලදී  අත්අඩංගුවට ගෙන සිටි බවද පොලිසිය කීය.

සිද්ධිය සම්බන්ධයෙන්  ලැබුණු තොරතුරු හා වීඩියෝ පට හරහා  සිදුකළ පරීක්ෂණ අනුව මෙම පිරිස අත්අඩංගුවට ගත් බවද පොලිස් මාධ්‍ය ප‍්‍රකාශකවරයා කියා සිටියේය.

මෙම පිරිස  අතර  රාජ්‍ය හා පෞද්ගලික ආයතන වල  සේවකයන් පිරිසක් ද සිටින බවත් ඉදිරියේ දී එම ආයතන වලට මොවුන් සම්බන්ධයෙන් දැනුම් දී  මොවුන්ට එරෙහිව  ආයතන සංග‍්‍රහය යටතේ  පියවර ගැනීම ද එම ආයතනවල බලධාරීන්ට  දැනුම් දෙන බවද පොලිස් මාධ්‍ය ප‍්‍රකාශකවරයා  කියා සිටියේය.

වයඹ පළාතේ  ස්ථාන කිහිපයක ඇති වූ  ප‍්‍රචණ්ඩ ක්‍රියා හේතුවෙන් එහි සාමය ආරක්ෂා කිරීමට ත්‍රිවිධ හමුදාවට අමතරව  පොලිස් නිලධාරීන් 5500 ට අධික නිලධාරීන් ප‍්‍රමාණයක් රාජකාරි සඳහා යොදවා ඇති බවද  ඒ මහතා කීය.

දිවයිනේ විවිධ පොලිස් ස්ථාන වලට අයත්  රථවාහන සැරසීම සඳහා, මත්ද්‍රව්‍ය වැටලීම් සඳහා , ජාතික ආරක්ෂාව සඳහා ,පැමිණිලි විභාග කිරීම සඳහා, අධිකරණ කටයුතු  සහ අපරාධ විමර්ශන සඳහා  සිටි නිලධාරීන්  මෙලෙස වයඹ පළාතට කැඳවීමට සිදු වූ බවද රුවන් ගුණසේකර මහතා  පැවසීය.