(දසුන් රාජපක්ෂ)

ජනාධිපතිවරයා සහ අගමැතිවරයා ඇතුළු ආණ්ඩුවේ ප්‍රබල මැති ඇමැතිවරුන්ගේ කටහඬට සමාන ව්‍යාජ හඬපට රන්ජන් රාමනායක මහතාගේ ආන්දෝලානාත්මක හඬපට සමඟ සම්බන්ධ කිරීමේ කුමන්ත්‍රණයක එක්සත් ජාතික පක්ෂය යෙදී සිටින බව පිවිතුරු හෙළ උරුමය පවසයි.

එක්සත් ජාතික පක්ෂයේ එම ව්‍යාජ හඬ පට උප්පරවැට්ටියට නොරැවටෙන ලෙස ජනතාවගෙන් ඉල්ලා සිටින බව පිවිතුරු හෙළ උරුමයේ නායක පාර්ලිමේන්තු මන්ත්‍රී නීතිඥ උදය ගම්මන්පිල මහතා පිටකෝට්ටේ පිහිටි එම පක්ෂ මූලස්ථානයේ අද (14) පැවැති මාධ්‍ය සාකච්ඡාවකදී  පැවසීය.

අන්‍ය ආගමිකයකු වන රන්ජන් රාමනායක මහතා  බුදු දහම අවමානයට ලක්වන අයුරින් කළ ප්‍රකාශය නිසා ආගමික ගැටුම් පවා ඇති වීමේ අවදානමක් ඇති වී තිබෙන බව ද උදය ගම්මන්පිල මහතා සඳහන් කළේය.

බුදු දහම සම්බන්ධයෙන් එවැනි ප්‍රකාශයක් සිදුකළ රන්ජන් රාමනායක මහතා මැදපෙරදිග රාජ්‍යක ජීවත් වූයේ නම් අද වන විට ඔහුගේ ජීවිතය පවා නොතිබෙන්නට ඉඩ තිබුන බව ද ඒ මහතා කියා සිටියේ ය.

මෙම මාධ්‍ය සාකච්ඡාවේ දී අදහස් දැක්වූ  පිවිතුරු හෙළ උරුමයේ නියෝජ්‍ය නායක මධුමාධව අරවින්ද මහතා කියා සිටියේ රන්ජන් සමඟ හඬ පටයක කතා කරන තරුණ කලාකාරිනියක් එම කතා නිසා තමාට සිදු වූ අවමානය ඉවසා ගැනීමට නොහැකිව  නිදි පෙති බී ජීවිතය තොර කර ගැනීමට උත්සාහ කර ඇති බවයි.

වාසනාවකට ඇයගේ ජීවිතයට හානියක් සිදු වී නොමැති බව පැවසූ  මධුමාධව අරවින්ද මහතා අනුන්ගේ ජීවිත සමඟ රන්ජන්රාමනායක කරන  මේ සෙල්ලම  නැවැ වීමට එක්සත් ජාතික පක්ෂය පියවර නොගන්නේ නම් නුදුරේදීම  සිරිකොත වටලන  බව කියා  සිටියේය.