(තිළිණි ද සිල්වා)
 
මානව හිමිකම්, සංහිඳියාව සහ වගවීම විෂයෙහි තවදුරටත් ප‍්‍රගතිය අත්කර ගැනීම සඳහා 2021 මාර්තු දක්වා වසර දෙකක දිගුවක් ලබාදීම ලංකාවේ දේශපාලනික කැපවීමත්, 2015 වසරේ සිට රජය විසින් දැනටමත් ගෙන ඇති ප‍්‍රගතිශීලී පියවරත් පිළිගැනීමේ සළකුණක් වශයෙන් ශ්‍රී ලංකා රජය සළකන්නේ යැයි විදේශ කටයුතු අමාත්‍ය තිලක් මාරපන මහතා සඳහන් කර සිටී.

ලංකාව පිළිබඳ ජිනීවා යෝජනාව පෙරේදා (21) මානව හිමිකම් කවුන්සිල 40 වැනි සැසිවාරයේ දී සම්මත වීමෙන් පසුව එහි සාමාජික රටවල් අමතමින් අමාත්‍යවරයා මේ බව කීය.

මානව හිමිකම් සම්බන්ධයෙන් බිම් මට්ටමේ ඇති කරුණු තහවුරු කරගැනීමට දේශීය ආයතන සහ ජාතික මානව හිමිකම් කොමිසම ඇතුළු ස්වාධීන ආයතන සමඟ සමීපව කටයුතු කරන්නැයි ද මානව හිමිකම් පිළිබඳ මහකොමසාරිස් කාර්යාලයට ඇරයුම් කරන බවද විදේශ අමාත්‍යවරයා එහිදී කියා සිටියේය.

එහිදී අමාත්‍ය තිලක් මාරපන මහතා මෙසේ ද පැවසීය.

‘‘මෙම කවුන්සිලයේ වැඩකටයුතු කෙරෙහි ශ්‍රී ලංකාව සතු විවෘත සහ ඵලදායී ප‍්‍රවේශය ඉතා හොඳින් හඳුනාගනු ලැබ තිබෙනවා. අපි ප‍්‍රධාන මානව හිමිකම් ගිවිසුම් සංවිධාන හතක් සහ විශ්ව කාලාන්තර සමාලෝචනය සමඟ සහසම්බන්ධයෙන් කටයුතු කර තිබෙනවා. මානව හිමිකම් විශේෂ නියෝජිතයන් සහ ස්වාධීන විශේෂඥයන් විසින් කරන ලද ශ්‍රී  ලංකා සංචාර අටකට ද පහසුකම් සපයා දී තිබෙනවා. එමගින්, ශ්‍රී ලංකාව කඩිනමින් ක‍්‍රියාත්මක කළ යුතු  1000 කට අධික නිර්දේශ සංඛ්‍යාවක් ලැබී තිබෙනවා. 

මා ඉකුත් 20 වැනි දින ප‍්‍රකාශ කළාක් මෙන්, අප අපගේ ප‍්‍රමුඛතාවන් නිවැරදිව සකස් කරමින් රටේ උත්තරීතර නීතිය වූ ආණ්ඩුක‍්‍රම ව්‍යස්ථාවෙන් සැපයෙන ප‍්‍රතිපාදන වලින් මාර්ගෝපදේශනය ලැබ, රටේ ජාතික අභිලාෂයත් එක හා සමානව සියලූ ලාංකිකයන්ගේ සුබ සාධනයත් ආරක්ෂා කිරීම පිණිස නව්‍ය හා ප‍්‍රායෝගික විසඳුම් සෙවීමට කැපවී සිටිනවා. 

ලංකාව අත්කරගෙන ඇති ප‍්‍රගතිය පිළිබඳවත්, එය මුහුණදෙන සැබෑ අභියෝග පිළිබඳවත් යථාර්ථවාදී තක්සේරුවක් ඊළඟ වසරේ මෙම කවුන්සිලයට ඉදිරිපත් කිරීම සඳහා මානව හිමිකම් පිළිබඳ මහකොමසාරිස් කාර්යාලයට ඉන් රුකුලක් ලැබේ. 

පොදු එකඟත්වයෙන් මෙම යෝජනාව සම්මත කරගැනීමට සහයදීම සම්බන්ධයෙන් මෙම කවුන්සිලයේ සියලූම සාමාජිකයන් වෙත ස්තූතිය පළ කරන්නටත් ශ්‍රී ලංකාව මෙය අවස්ථාවක් කර ගන්නවා යැයි ද විදේශ අමාත්‍යවරයා කියා සිටියේය.