(නාලක සංජීව දහනායක)

තමන්ගේ රුව ප‍්‍රදර්ශනය කරමින් දිවයින පුරා ප‍්‍රදර්ශනය කර තිබෙන කටවුට් සහ බැනර් සියල්ලම වහාම ගලවා ඉවත්කරන්නැයි ශ්‍රී ලංකා පොදුජන පෙරමුණේ ජනාධිපතිවරණ අපේක්‍ෂක ගෝඨාභය රාජපක්‍ෂ මහතා සියලූම සංවිධායකවරුන්ට දැනුම් දී තිබේ.

පොලිතීන් හා ප්ලාස්ටික් වලින් තොර මැතිවරණ ව්‍යාපාරයක් ක‍්‍රියාත්මක කරන බවට ගෝඨාභය රාජපක්‍ෂ මහතා පක්‍ෂ සම්මේලනයේ දී ජනතාවට පොරොන්දු විය. ඔහු මේ බව දැනුම්දී තිබෙන්නේ ඒ අනුවය.

එම පොරොන්දුව තම මැතිවරණ ව්‍යාපාරයේ ප‍්‍රතිපත්තියක් බැවින් ඉදිරියේදී තමන්ගේ රුව සහිත බැනර් හා කටවුට් ප‍්‍රදර්ශනය කිරීමෙන් වැළකී පරිසර හිතකාමීව මැතිවරණ ව්‍යාපාරයේ නිරතවිය යුතු බවට ගෝඨාභය රාජපක්‍ෂ මහතා විසින් සියලූම සංවිධායකවරුන්ට දැනුම් දී ඇත.

ජනාධිපතිවරණ අපේක්‍ෂක ගෝඨාභය රාජපක්‍ෂ මහතාට සහය පළකරමින් පාර්ලිමේන්තු මන්ත‍්‍රීවරුන් ඇතුළු ජනතා නියෝජිතයන් සහ විවිධ සංවිධාන විසින් කටවුට් හා බැනර් ප‍්‍රදර්ශනය කිරීම ජනතාවගේ විවේචනයට ලක්ව තිබෙන බවට ගෝඨාභය රාජපක්‍ෂ මහතාගේ මැතිවරණ මෙහෙයුම් නිළධාරින් ඔහුට පෙන්වා දී ඇතැයි වාර්තා වේ.

මෙම උපදෙස් අනුව ගෝඨාභය රාජපක්‍ෂ මහතාට සුභ පතමින් හම්බන්තොට දිස්ත‍්‍රික්කය පුරාම ප්‍රදර්ශනය කර තිබූ සියලූම පොස්ටර්, කටවුට්, බැනර් හා තොරණ සියල්ලම මේ වනවිට ගලවා ඉවත් කරමින් සිටින බව ශ්‍රී ලංකා පොදුජන පෙරමුණේ ප‍්‍රකාශකයකු පැවැසීය.