(හිරාන් ප්‍රියංකර ජයසිංහ)

මරා වළ දමා තිබූ කෝටිපති ව්‍යාපාරිකයකුගේ සිරුර සම්බන්ධ පශ්චාත් මරණ පරික්ෂණය පුත්තලම මූලික රෝහලේ විශේෂඥ අධිකරණ වෛද්‍ය නිලධාරී වරයා වෙත ඉදිරිපත් කරන ලෙස පුත්තලම දිසා විනිසුරු හා මහෙස්ත්‍රාත් අනුර ඉන්ද්‍රජිත් බුද්ධදාස මහතා පුත්තලම මූලස්ථාන පොලිසියට අද (15) නියෝග කළේය.

මෙසේ මරා දමා තිබුණේ පුත්තලම නල්ලන්දළුව ප්‍රදේශයේ පදිංචි කෝටිපති ව්‍යාපාරිකයකු වූ 36 හැවිරිදි ඒ.ආර්.එම්. සෆිස්  නැමති දෙදරු පියකු බව පොලිසිය පවසයි.

මරණයට පත් ව්‍යාපාරිකයා පොල් ඉඩම් හිමිකරුවකු සේම පොලි පදනම මත මුදල් දීම සිදුකරන අයෙකු බවද කියයි.

අදාල ව්‍යාපාරිකයා පසුගිය 11 වන දින සවස සිට නිවසින් අතුරුදහන් වී ඇති බවට ඥාතීන් පුත්තලම පොලිසියට කරන ලද පැමිණිලි  මත සිදුකරන ලද දිර්ඝ  විමර්ශන වලදී අදාල ඝාතනය සම්බන්ධව හෙළිවූ තොරතුරක් මත අද (15) දින සවස මෙම ව්‍යාපාරිකයා මරා වල දමා තිබූ ස්ථානය සොයා ගත් බව පොලිසිය පැවසීය.

අදාල ව්‍යාපාරිකයා පසුගිය 11 දින සවස 2.30 ට පමණ ඔහුගේ යතුරු පැදියකින් පොලියට මුදල් දී තිබූ තැනැත්තෙකුගෙන් පොලි මුදල් ලබා ගැනීමට ගොස් තිබියදී ඝාතනයට ලක්ව ඇති බවට මූලික පරීක්ෂණ වලදී හෙළිවි තිබේ.

පොලියට මුදල් ලබා ගත් තැනැත්තා හා ව්‍යාපාරිකයා අතර බහින් බස් වීමක්   සිදුවීමේන් පසුව මෙම ඝාතනය මුදල් ලබා ගත් තැනැත්තාගේ නිවසේදී  සිදුව ඇති බව දැනට ලැබී ඇති තොරතුරු වලින් සනාථ වී තිබේ.

ඝාතන සම්බන්ධයෙන් පොලි මුදල් ලබා ගත් සැකකරු හා ඔහුගේ මිතුරෙකු බව කියන අයකු ද ප්‍රශ්න කිරීම සඳහා අද (15) දින පොලිසිය මගින් අත් අඩංගුවට ගෙන  තිබුණී.

මෙසේ සැකකරුවන් අත්අඩංගුවට ගැනීමට හැකිව තිබුණේ අදාල ව්‍යාපාරිකයා සැකකාර පොලියට මුදල් ලබා ගත් තැනැත්තාගේ නිවස ගමන් කරන සීසීටීවී දර්ශන ස්ථාන කිපයකදී සොයා ගැනීමේන් පසුව බවත් එයට අමතරව දුරකථන ඇමතුම් සම්බන්ධව ලබා ගත් තොරතුරුත් මත කියයි.

මෙම සැකකරුවන්ගෙන් කළ දිර්ඝ ප්‍රශ්න කිරීම් වලින් පසුව පොලිසිය මෙම සැකකරුවන් ව්‍යාපාරිකයා වල දමා තිබූ පුලිදිවායල් වෙට්ටුකාඩු ප්‍රදේශයේ ඉඩමේ අදාල ස්ථානය පුත්තලම දිසාවිනිසුරුවරයා ඉදිරියෙදී කැණීම සිදුවූ අතර එහිදී අදාල සිරුර ඉටි කවරයක බහා අඩි පහකට ආසන්න ගැඹුරක වලක් කපා වල දමා ඉන් පසුව කිසිවකුට සැක නොසිතන ලෙසට එම වල පොල් අතු හා පොල් කොට දමා වසා දමා තිබුණී.

අදාල සිරුර පුත්තලම දිසා විනිසුරු ඉදිරියේ ගොඩ ගැනීම සිදුවූ අතර එම අවස්ථාවට  පුත්තලම මූලික රෝහලේ සහකාර අධිකරණ වෛද්‍ය නිලධාරී වෛද්‍ය නදිකා අබේවික්‍රම මහත්මිය ද එක්වී තිබුණි.