වසන්ත චන්ද්‍රපාල
 
රජය විසින් සකස් කිරිමට බලාපොරොත්තු වන නව ආණ්ඩුක්‍රම ව්‍යවස්ථාව අනුව උතුරු නැගෙනහිර එකතු කරන්න පුළුවන් උතුරේ සුමන්තිරන්ලා වගේ මන්ත්‍රීවරුත් ඉල්ලන්නේ ඒක නමුත් එයට අපි මුස්ලිම් කොංග්‍රසය වශයෙන් විරුද්ධ බව එක්සත් ජාතික පෙරමුණේ දිගාමඩුල්ල පාර්ලිමේන්තු මන්ත්‍රී පළාත් පාලන පලාත් සභා  අමාත්‍ය එච්.එච්.එම්.හරේෂ් මහතා පැවසීය.

අම්පාර දිස්ත්‍රික්කයේ පළාත් පාලන ආයතනවල ඉදිරි සංවර්ධන කටයුතු පිළිබඳව මන්ත්‍රීවරුන් දැනුවත් කිරිමේ වැඩසටහනක දී මෙසේ කීවේය.

මෙහිදී තවදුරටත් අදහස් දැක්වු නියෝජ්‍ය අමාත්‍යවරයා මෙසේ පැවසීය.

උතුරු නැගෙනහිර එකතු කරනවා කියන එක අපිට ලොකු අභියෝගයක්. ඒක නිසා අපි සියලු දෙනාම මේකට විරුද්ධ විය යුතුයි. මම මුස්ලිම් කොංග්‍රසයේ නියෝජ්‍ය නායකයා හැටියට මේ පිළිබඳව අපි ආණ්ඩුවට කියලා තියෙනවා. මේ වැඩේට අපි විරුද්ධයි කියලා.

යුද්ධයෙන් පස්සේ අපි නිදහසේ ජීවත්වෙනවා. නිදහස් උත්සවය දවසේ විග්නේශ්වරන් මහත්තයා ඒකට විරුද්ධව වැඩ කළා. ඒවාගේම සුරේෂ් ප්‍රේමචන්ද්‍ර ගජේන්ද්‍ර කුමාර පොන්නම්බලන් වගේ අය දැනුත් අපේ රටට විරුද්ධව වැඩ කරනවා. අම්පාර ජනතාව  හැටියට ගත්තොත් අපි සියලුදෙනාම යුද්ධයට මුහුණ දුන්න ජනතාව. අපි සිංහල, මුස්ලිම්,දෙමළ ජනතාව හැටියට එකට සිටිය යුතුයි.

පහුගිය කාලේ අපේ රටේ කුරිරු යුද්ධයක් තිබුණා. ඒ යුද්ධයෙන් රට ආරක්ෂා කර ගැනීමට අපේ රටේ රණවිරුවන් ඒ වගේම පොලිස් නිලධාරින් ඔවුන්ගේ ජීවිත පූජා කළා. ඒක අපි අමතක කරන්න බැහැ. අපේ රණවිරුවන් අපේ රට පාලනය කරපු නායකයින් නිසා අපි නිදහසේ  ජීවත්වෙනවා. ඒක නිසා අපි මේ අවස්ථාවේ ඒ අයට ගරු කළ යුතුයි.

ඒ යුද්ධය නිසා අපේ රටේ විශාල හානියක් සිද්ධ වුණේ උතුර නැගෙනහිර ජනතාවට දැන් ඒක අමතක කරලා අපි ඉන්නවා. අපේ වගකීම අපේ පළාතේ ජනතාවට මොනවා හරි කරන්න ඕනෑ. 

වර්තමාන අගමැතිතුමා රනිල් වික්‍රමසිංහ මහතා  ව්‍යාපෘති ගණනාවක් ක්‍රියාත්මක කරන්න යනවා ඒක නිසා අම්පාර නියෝජනය කරන මන්ත්‍රීවරයෙක් හැටියට  ඔබ සැමගේ සහයෝගය අරගෙන මේ ව්‍යාපෘතිය සාර්ථක කරගත යුතුයි.