( තිළිණි ද සිල්වා)
 
ශ්‍රී ලංකා සංචාරක ප‍්‍රවර්ධන කාර්යාංශයේ අධ්‍යක්ෂ මණ්ඩල සාමාජිකයෙකු ලෙස ජනප‍්‍රිය ගායක ඉරාජ් වීරරත්න මහතා පත් කරනු ලැබ ඇත.සංචාරක සංවර්ධන අමාත්‍ය ප‍්‍රසන්න රණතුංග මහතා විසින් අද (14) පත්කිරීම සිදුකර ඇත. මෙම පත්කිරීම වසරක කාලයක් සඳහා වලංගු වේ.

ජනාධිපති ලේකම් ආචාර්ය පි.බී.ජයසුන්දර මහතාගේ ප‍්‍රධානත්වයෙන් යුතු රජයේ ආයතන සඳහා ප‍්‍රදානීන් තෝරා ගැනීම සඳහා පත් කළ සය පුද්ගල විද්වත් කමිටුව විසින් සංචාරක අමාත්‍යාංශ ලේකම්වරියට කළ දැනුම් දීමකට අනුව ඉරාජ් වීරරත්න මහතා ශ්‍රී ලංකා සංචාරක ප‍්‍රවර්ධන කාර්යාංශයේ අධ්‍යක්ෂ මණ්ඩල සාමාජිකයෙකු ලෙස පත් කළ බවද සංචාරක අමාත්‍යාංශයේ ජ්‍යෙෂ්ඨ නිලධාරියෙක් ලංකාදීපයට ඊයේ පැවසීය.
 
නව පත් කිරීම පිළිබඳව දන්වමින් සංචාරක අමාත්‍යවරයා ඉරාජ් වීරරත්න මහතා වෙත ලිපියක්ද යොමුකර තිබේ.එසේම මෙම තනතුර භාර ගන්නේද යන්න පිළිබඳව සඳහන් කරන ලෙසත් අමාත්‍යවරයා සිය ලිපියෙන් ඔහුට දන්වා යවා ඇත.
 
2002 වසරේ සිට මේ දක්වාම ගායකයෙකු , සංගීත අධ්‍යක්ෂකවරයෙකු හා සංගීත සංයෝජකවරයෙකු ලෙස ක්ෂේත‍්‍රයේ ජනප‍්‍රිය ඉරාජ් වීරරත්න මහතා කොළඹ රාජකීය විද්‍යාලයේ ආදිශිෂ්‍යයෙකුද වේ.ආසියා කලාපයේ බටහිර හිප් පොප් ගායකයෙකු ලෙසද ජනප‍්‍රිය වී සිටින හෙතෙම පසුගිය කාලයේදී ප‍්‍රසිද්ධ දේශපාලනයේ නිරතවීම හේතුවෙන් සමාජ මාධ්‍ය  ඔස්සේ දැඩි කතා බහට ලක්වූ චරිතයක්ද විය.