ඇමෙරිකා එක්සත් ජනපදයේ නිව්යෝක් නුවර පිහිටි ශාන්ත පැට්‍රික් දේවස්ථානයට ගෑස් කෑන් දෙකක් සහ දල්වන තුනක් (ලයිටර) රැගෙන ගිය පුද්ගලයකු අත්අඩංගුවට ගත් බව නිව්යෝක් පොලිසිය අද (18) ප්‍රකාශ කළේය.

ප්‍රංශයේ පැරිස් නුවර ඓතිහාසික නොත්‍රදාම් දේවස්ථානයේ වහළ කොටස ගිනිගෙන විනාශ වීමෙන්  දින කිහිපයකට පසු මෙය සිදුවිය.

මෝටර් රථයේ ඉන්ධන අවසන් වීම නිසා දේවස්ථානය කෙටි මාර්ගයක් ලෙස භාවිත කරමින් ඒ තුළින් ඉන්ධන පිරවුම්හලක් වෙත ගමන් කළ බව අත්අඩංගුවට පත්වූ පුද්ගලයා ප්‍රකාශ කළේ යැයි නිව්යෝක් පොලිස් දෙපාර්තමේන්තුවේ නියෝජ්‍ය කොමසාරිස් ජෝන් මිලර් මහතා පැවැසීය. 
 
එහෙත් අත්අඩංගුවට ගත් පුද්ගලයා දුන් පිළිතුරු එකිනෙකට පරස්පර යැයි නියෝජ්‍ය පොලිස් කොමසාරිස් මිලර් කීවේය. 

“ඔහුගේ හිතේ මොනවද තිබ්බේ, ඔහු මොනවා කරන්න හැදුවද කියලා අපි දන්නේ නැහැ” යැයි ද හෙතෙම කීවේය. 

අත්අඩංගුවට ගත් සැකකරු 37 හැවිරිදි වියේ පසුවන මාර්ක් ලැම්පැරෙලෝ නම් පුද්ගලයකු වූ අතර ඔහු විශ්වවිද්‍යාල කථිකාචාර්යවරයකු බව ද පැවසේ. 

නිව්යෝක් නුවර ඉදිර කර තිබෙන ශාන්ත පැට්‍රික් දේවස්ථානය නව ගෝතික ආරට නිර්මාණය කරන ලද්දක් වන අතර මැන්හැට්න්හි හදවත ලෙස හඳුන්වයි. එම දේවස්ථානයේ ඉදිකිරීම් ආරම්භ කරන ලද්දේ 1878 වසරේදී වන අතර ඉදි කිරීම් අවසන් කරන ලද්දේ 1880 වසරේදීය. මේ අතර 2015 වසරේදී දේවස්ථානයේ පූර්ණ ප්‍රතිසංස්කරණයකට ලක් කළේය.
 
ඒ.එෆ්.පී. ඇසුරිනි 
 
055