(මුදිතා දයානන්ද) 
            
මහජනතාවගේත් රටේත් ආරක්ෂාව ගැන අවම වගකීමක්වත් දැරිය නොහැකි, පාලනයකින් රට තව දුරටත් අනාරක්ෂිතවීම වළක්වා ආණ්ඩුව ගෙදර යැවීමේ අරමුණ ඇතිව ආණ්ඩුවට එරෙහිව විශ්වාසභංගයක් හෙට (21) කථානායකට බාර දෙන බව ජනතා විමුක්ති පෙරමුණේ නායක අනුර කුමාර දිසානායක මහතා අද (20) පැවසීය.

දිසානායක මහතා මෙසේ පැවසුයේ පැලවත්තේ පිහිටි ජනතා විමුක්ති පෙරමුණේ ප‍්‍රධාන කාර්යාලයේදි පැවති මාධ්‍ය හමුවකදීය.

රිෂාඩ් බදියුදීන් ඇමැතිවරයාට එරෙහිව ඉදිරිපත් කර ඇති විශ්වාසභංග යෝජනාව සම්බන්ධයෙන් ද එහි ඉදිරිපත්ව ඇති කරුණු සැළකිල්ලට ගෙන තීරණයක් ගන්නා බවද කිසිසේත්ම අපරාධකරුවන්ට සහය දැක්වීමේ ප‍්‍රතිපත්තියක තම පක්ෂය නැති බවද දිසානායක මහතා එහිදි පැවසිය.

අප්‍රේල් 21 ප‍්‍රහාරය පිළිබඳව තොරතුරු හැකි බවට මෙරට හා විදේශීය බුද්ධි අංශවලින් ලැබි තිබියදීත් එයට මුහුණ දීමට කිසිදු ක‍්‍රියාමාර්ගයක් නොගෙන සිටීමෙන් ජනාධිපතිත් අගමැතිත් කැබිනට් මණ්ඩලයත් ජනතාවගේ ආරක්ෂාව බිංදුවට දමා ඇතැයිද ඔහු පැවසීය.

ඒ අනුව මෙම ප‍්‍රහාරයේ පළමු අපරාධකරුවා වන්නේ ප‍්‍රහාරකයින් වන අතර දෙවැනි අපරාධකරුවා ආණ්ඩුව බවද තෙවැනි අපරාධකරුවා වන්නේ ත‍්‍රස්තයින්ට ආරක්ෂාව හා ආධාර උපකාර සපයන්නන් බවද ඔහු පැවසීය.

ත‍්‍රස්ත කල්ලි හා ඒ අයට ආධාර උපකාර කරන අපරාධකරුවන් සම්බන්ධයෙන් ආරක්ෂක අංශ නීතිමය ක‍්‍රියාමාර්ග ගනිමින් සිටියත් දෙවන අපරාධකරු වන ආණ්ඩුව සම්බන්ධයෙන් ක‍්‍රියාමාර්ග ගැනීමට සිදුවන්නේ ජනතාවට බවද දිසානායක මහතා පැවසීය. 

ආණ්ඩුව සම්බන්ධයෙන් තමන්ගේ තීරණය ගත හැකි මැතිවරණයක් ජනතාව හමුවේ දැනට නැති බැවින් පාර්ලිමේන්තුව තුළදී ගත හැකි පියවර ගැනිමට තම පක්ෂය තීරණය කළ බවද මෙම විශ්වාසභංගය ඉදිරිපත් කෙරෙන්නේ ඒ අනුව බවද ඔහු වැඩිදුරටත් පැවසීය. 

මෙම විශ්වාසභංගය ඉදිරිපත් වන්නේ අගමැතිත්, ආරක්ෂක ඇමති ප‍්‍රමුඛ කැබිනට් මණ්ඩලයත් ඇතළු ආණ්ඩුවට එරෙහිව බවද ඔහු පැවසීය.