(නිමන්ති රණසිංහ)
(ඡායාරූප - ඉෂාන් සංජීව)


සීමාසහිත විජය පුවත්පත් සමාගමේ පූර්ණ දායකත්වයෙන් 16 වන වරටත් සිදුකරන තන්තිරිමලේ රජමහා විහාරයේ ආලෝක පූජාව අද (15 වැනිදා) ආරම්භ විය. උතුරු, නැගෙනහිර දෙපළාතේ උප ප්‍රධාන සංඝනායක, තන්තිරිමලේ චන්ද්‍රරතන නාහිමි, දෙහිවල සහනෝධන පදනමේ අධ්‍යක්ෂ පංචාරාම නාහිමි ඇතුළු මහා සංඝ රත්නය මෙම ආලෝක පූජාව වෙනුවෙන් වැඩම කර සිටියහ.

විජය පුවත්පත් ආයතනයේ අධ්‍යක්ෂ ලාල් ජයවර්ධන මහතා සහ වාරිමාර්ග අමාත්‍ය පී. හැරිසන් මහතා විසින් අද දින ආලෝක පූජාව ආරම්භ කරන ලදි. මහවිලච්චිය ප්‍රාදේශීය ලේකම් එන්. එච්. ආර්. නිශන්ත මහතා, ඇතුළු සම්භාවනීය ආරාධිතයින් පිරිසක්ද මෙම ආලෝක පූජාවට සහභාගි වූහ. පූජෝත්සවයේ ආරක්ෂාව වෙනුවෙන් පොලිසිය, යුද හමුදාව සහ සිවිල් ආරක්ෂක බලකායේ නිලධාරීහු සිය දායකත්වය සැපයූහ.

ආලෝක පූජාව ආරම්භ වීමෙන් පසුව පොසොන් බැති ගී සරණිය ආරම්භ විය. තන්තිරිමලේ ප්‍රදේශයේ පාසල් සහ දහම් පාසල් 11ක සිසු දරුදැරියන් පිරිසක් මෙම පොසොන් බැති ගී සරණියට සහභාගි වූහ.

මෙම බැති ගී සරණියෙන් අනතුරුව එම දරුවන් වෙනුවෙන් සහතික පත් සහ මුදල් තෑගි පිරිනැමීමටද විජය පුවත්පත් ආයතනය මූලිකත්වයෙන් සිදු කෙරිණ.