නිමල කොඩිතුවක්කු
 
මෙවර පළාත් පාළන මැතිවරණය සඳහා මානව හිමිකම් පිලිබඳ විද්වද් සංසදයේ  මැතිවරණ නිරීක්ෂන ජාලය දිස්ත‍්‍රික්ක  19ක් ආවරණය වන පරිදි නිරීක්ෂකයන් 302ක් යොදවා ඇතැයි එහි ප‍්‍රධාන විධායක ආචාර්ය උදිත ගුණසේකර මහතා පැවසීය.
 
තම සංසදය වෙත  මේවනවිට සිද්ධීන්  421ක් සම්බන්ධයෙන් පැමිණිලි ලැබී ඇති බවත් ඉන් 264ක්ම නීතිවිරෝධී ප‍්‍රචාරක කටයුතු සම්බන්ධයෙන් ලැබුණු පැමිණිලි බවත් ඔහු කියා සිටියේය.
 
මානව හිමිකම් පිලිබඳ විද්වද් සංසදයේ  මැතිවරණ නිරීක්ෂන ජාලය මරදාන සමාජ හා සාමයික කේන්ද්‍රයේ අද (1) කැඳවූ මාධ්‍ය හමුවකට එක්වෙමින් ඒ මහතා මේ බව පැවසීය.
 
එහිදී වැඩිදුරටත් අදහස් දැක්වූ ආචාර්ය උදිත ගුණසේකර මහතා මෙසේද කීය. 
 
‘‘පළාත් පාලන මැතිවරණය ප‍්‍රකාශයට පත් කළ දිනයේ සිට මේ දක්වා ගත වී ඇති කාලය තුල මානව හිමිකම් පිළිබඳ විද්වත් සංසදයේ මැතිවරණ නිරීක්ෂණ ජාලය විදියට අපි මෙම මැතිවරණ ක‍්‍රියාවලිය නිරීක්ෂණය කිරීමේ දී අණාවරණ වු කරුනු අනුව පෙර මැතිවරණ වලට සාපේක්ෂව මෙවර මැතිවරණයේදී සිද්ධීන් ප‍්‍රමාණයේ යම්කිසි අඩුවීමක් තියෙනවා. නව මැතිවරණ ක‍්‍රමය නිසා  මෙම පැමිණිලි  සංඛ්‍යාව අඩුවී ඇති බවට අපි විශ්වාස කරනවා. 
 
අපේ නිරීක්ෂණයන්ට අනුව මේ දක්වා මැතිවරණ ප‍්‍රචණ්ඩ ක‍්‍රියා ලෙස සිදුවීම් 42ක් ද, නීති විරෝධී ප‍්‍රචාරක කටයුතු ලෙස පැමිණිලි 264ක ප‍්‍රමාණයක්ද , මහජන මතයට අනිසි බලපෑම් සිදුවන ක‍්‍රියාවන් 78ක් ද, ප‍්‍රධාන කරුණු ලෙස ඉස්මතු කර දැක්විය හැකියි.  
 
මෙයට අමතරව රාජ්‍ය සම්පත් අවභාවිතා කිරීම, රාජ්‍ය නිළධාරීන් මැතිවරණ කටයුතුවලට යොදාගැනීම, අපේක්ෂකයන් තමන් දරණ ලද තනතුරු වල රැඳී සිටීම , රාජ්‍ය නිලධාරින් බඳවාගැනීම ,  උසස්වීම් ලබාදීම හා මාරුවීම් ලබාදීම මෙන්ම සාමකාමී මැතිවරණ ක‍්‍රියාවලියට බාධා කිරීම් යන අංශ යටතේ තවත් පැමිණිලි අප වෙත ලැබී තිබෙනවා යැයිද ඔහු කියා සිටියේය.‘‘