(තිළිණි ද සිල්වා සහ රංජන් කටුගම්පොළ )

කෝවිඩ් 19 වයිරසය  ආසාදනය වී මරණයට පත්වන මුස්ලිම් ජාතිකයින්ගේ  සිරුරු ආදාහනය  කිරීම ඉස්ලාම් දහමට සහ ඉගැන්වීමට පටහැනි බව පවසමින් හිටපු අමාත්‍ය රිෂාද් බදියුදීන් මහතා ඇතුළු හිටපු මන්ත්‍රීවරුන් සිව්දෙනෙකු ගොනු කළ මූලික අයිතිවාසිකම් පෙත්සම ලබන ජූලි මස 22 දින සලකා  බැලීමට ශ්‍රේෂ්ඨාධිකරණය තීන්දු කළේය.

මෙම  මූලික අයිතිවාසිකම් පෙත්සම මුර්දු ප්‍රනාන්දු, එස්.තුරෙයිරාජා, යසන්ත කෝදාගොඩ  යන ශ්‍රේෂ්ඨාධිකරණ විනිසුරු මඩුල්ල හමුවේ කැඳවූ අතර එහි දී  පෙත්සම වෙනත්  දිනයක  කැඳවීමට  ශ්‍රේෂ්ඨාධිකරණ විනිසුරු  මඩුල්ල නියම කළේය.

හිටපු අමාත්‍යවරන් හා හිටපු  මන්ත්‍රීවරුන් වන  රිෂාඩ්  බදුද්දීන් ,අමීර් අලි,ඒ.එම්. මහරූප්,හුසේන්   බහිලා යන මහත්වරුන් ගොනු කළ මෙම පෙත්සම් වල වගඋත්තරකරුවන් වශයෙන් සෞඛ්‍ය ඇමති පවිත්‍රා වන්නිආරච්චි, සෞඛ්‍ය සේවා අධ්‍යක්ෂ ජෙනරාල් අනිල් ජාසින්හ, සෞඛ්‍ය  අමාත්‍යංශ ලේකම් සහ නීතිපති  නම් කරනු ලැබ සිටිති.

කෝවිඩ් වසංගත යට ගොදුරු වී  මියගිය අයගේ  සිරුරු සම්බන්ධයෙන් කටයුතු කළ යුතු ආකාරය  පිළිබඳ  සඳහන් කරමින්  ඉකුත් අප්‍රේල්  මස 11වැනිදා ගැසට් නිවේදනයක් නිකුත් කර ඇති බව පෙත්සම්කරුවෝ කියති.

එහි "61 a " දරන රෙගුලාසියට අනුව එම සිරුරු ආදාහනය කළ යුතු බවට සඳහන් කර තිබුණද එහෙත්  ලෝක සෞඛ්‍ය සංවිධානය විසින් නිකුත් කර ඇති  මාර්ගෝපදේශ  මාලාව  අනුව එම සිරුරු ආදාහනය  කිරීම හෝ මිහිදන් කිරීමට  හැකි බව පෙත්සම්කරුවෝ කියා සිටිති.

එසේ තිබියදී  මෙරට සිදුවන  මරණ සම්බන්ධයෙන්  කටයුතු කළ යුතු ආකාරය පිළිබඳ ගැසට් නිවේදනයක් නිකුත් කර  එම සිරුරු ආදාහනය කළ යුතු බව ට රෙගුලාසි  පැනවීම  ආණ්ඩුක්‍රම ව්‍යවස්ථාව උල්ලංඝනය කිරීමක්  බව පෙත්සම්කරුවෝ කියති.

සෙසු රටවල එසේ මියගිය අයගේ සිරුරු ආදාහනය මෙන්ම භූමදානය කරන බව ඔවූහූ පෙන්වා දී ඇත. ඉස්ලාම් දහම අදහන මුස්ලිම් ජාතිකයන් එම දහමට අනුව  මිහිදන්  කළ යුතුය.

එහෙත්  ඊට පටහැනිව යමින්  මියගිය  අයගේ සිරුරු ආදාහනය කළ බවද එය අයිතිවාසිකම්  උල්ලංඝනය කිරීමක්  බවද මෙම පෙත්සම මගින් පෙන්වා දී ඇත.

එබැවින් මෙම  රෙගුලාසි පනවමින් නිකුත් කර ඇති ගැසට් නිවේදනය  ක්‍රියාත්මක වීම අත්හිටුවන    අතුරු   නියෝගයක් නිකුත් කරන ලෙස ද කෝවිඩ් වසංගත ය නිසා  මියයන  මුස්ලිම් ජාතිකයන් ආදාහනය  නොකරන ලෙසට  බලධාරීන්ට නියෝගයක් කරන්නැයිද පෙත්සම්කරුවෝ අධිකරණයෙන් ඉල්ලා සිටිති.