(ඉන්දිකා රාමනායක)
 
ආන්දෝලනාත්මක සුදුවෑන් මාධ්‍ය හමුව සම්බන්ධ සැබෑ තතු හෙළි නොකරන ලෙසට  දන්වමින් හිටපු අමාත්‍ය  රාජිත සේනාරත්න මහතාගෙන්  මරණ තර්ජනය එල්ල වී ඇති  බව පවසමින් එම සුදුවෑන්   මාධ්‍ය හමුවට එක් වු කොටහේන පදිංචි ඩබ්ලිව්. ජී. අතුල සංජීව මදනායක  අම්පාර පදිංචි එස්. ඩබ්ලිව්. ඒ. සරත් කුමාර යන දෙදෙනා  අද (27)  අපරාධ පරීක්ෂණ දෙපාර්තමේන්තුවට පැමිණ පැමිණිල්ලක් ඉදිරිපත් කළහ.
 
මෙම සිද්ධියේ සැබෑ තොරතුරු හෙළිදරුවූ නොකරන ලෙස පවසමින් පාතාල සාමාජිකයකු  ලවා දුරකතන ඔස්සේ  මෙම තර්ජනය එල්ල කළ  බවට පවසමින් ඔවුන් දෙදෙනා අපරාධ පරීක්ෂණ දෙපාර්තමේන්තුවට පැමිණිලි කර තිබිණි.
 
අපරාධ පරීක්ෂණ දෙපාර්තමේන්තුවට පැමිණිල්ල  ඉදිරිපත් කිරීමෙන් පසු එහි සිටි මාධ්‍යවේදීන් අමතමින් සුදු වෑන්  මාධ්‍ය හමුවේදී  සුදු වෑන් රියදුරෙකු ලෙස පෙනී සිටි අතුල සංජීව මදනායක මෙසේ පැවසීය.
 
“මෙම සිදු වෑන්  මාධ්‍ය සාකච්ඡාව නිවැරදි නොකරන ලෙස පාර්ලිමෙන්තු රාජිත සේනාරත්න මහාත දිගින් දිගටම මරණීය තර්ජන එල්ල කරනවා. ඇප ලැබී අධිකරණ භූමියෙන් පිටතට පැමිණ  අපි කිව්වා  අපේ සැබෑ මුහුණින් මාධ්‍ය සාකච්ඡාවක් පවත්වලා  සිද්ධියේ ඇත්ත තත්ත්වය හෙළි කරනවා කියලා.
 
කොටහේනේ  පදිංචි  වැලිකඩ බන්ධනාගරයේ සිටින පාතාල කල්ලි සාමජිකයෙක්  දුරකථනය ඔස්සේ ඇමතුමක් ලබා දී කිව්වා මෙම මාධ්‍ය සාකච්ඡාව නිවැරදි කරන්න එපා. මාධ්‍ය සාකච්ඡාව නිවැරදි කළොත්  උසාවි දිනයට අධිකරණයට එන්නට එපා කියා. එහෙම ආවොත් ගෙරද සුදු කොඩි එල්ලනවා කියලා
 
අපට තර්ජනය කළ සියලූ දේ  පිළිබඳ සාක්කි   අපේ දුරකතනයේ තිබෙනවා.  අපි  මේ දුරකතනය අපරාධ පරීක්ෂණ දෙපාර්තමේන්තුවට බාර දී රාජිත සේනාරත්න මහතාට එරෙහිව පැමිණිල්ලක් ඉදිරිපත් කළා” යැයිද ඔහු වැඩිදුරටත් කියා සිටියේය.