(සමන් පාලිත නානායක්කාර)
 
හල්දුම්මුල්ල කදිරේෂන් ඇල්ල පෙදෙසෙහිදී අද(25) අලුයම වෑන් රථයක් අඩි 300ක පමණ ප්‍රපාතයකට පෙරැළීමෙන් පුද්ගලයකු මිය ගොස් තිදෙනෙකු තුවාල ලබා ඇතැයි හල්දුම්මුල්ල පොලිසිය කියයි.
 
මිය  ගොස් ඇත්තේ මඩොල්සිම පදිංචිව සිටි එම්. නාගනාදන් (57) නමැත්තෙකි.
 
කොළඹ සිට පස්සර මඩොල්සිම බලා ධාවනය වෙමින් තිබූ වෑන් රථය අධිබලැති විදුලි කණුවක ගැටී මෙම අනතුර සිදුව තිබේ.වෑන් රථය  ගැටීමෙන් අධිබලැති විදුලි රැහැන් කණුව  ප්‍රධාන මාර්ගය හරහා කඩා වැටීම නිසා එය ඉවත් කරන තෙක්  කොළඹ-බදුල්ල ප්‍රධාන මාර්ගය  එම ස්ථානයෙන්  පැයකට අධික කාලයක් සම්පූර්ණයෙන් අවහිර වී තිබුණි.
 
රෝගී පුද්ගලයෙකු   රැගෙන කොළඹ සිට එන අතරතුරදී රියැදුරුට නින්දයාම හේතුයේ අනතුර වී ඇති බව පොලිස් පරීක්ෂණවලදී අනාවරණය වී තිබ. 
 
අඩි 300ක පමණ ප්‍රපාතයෙහි සිට තුවාලකරුවන් ගෙන ඒම සඳහා හල්දුම්මුල්ල  පොලීසිය ප්‍රදේශවාසීන් සමග මහත් පරිශ්‍රමයක් දැරූහ. 
 
තුවාලකරුවන් දියතලාව මූලික රෝහලට ඇතුළත් කර ඇති අතර ඔවුන්ගේ තත්වය බරපතල බව ද රෝහල්  ආරංචිමාර්ග සඳහන් කරයි.  
 
 හල්දුම්මුල්ල   පොලිසිය පරීක්ෂණ පවත්වයි.