(ක.ග.කරුණාරත්න)
 

පොලොන්නරුව ලංකාපුර ප්‍රාදේශීය සෞඛ්‍ය වෛද්‍ය නිලධාරී කොට්ඨාසයෙන් තවත් කොරෝනා රෝගියෙකු අද (03) හමු වූ බව පොලොන්නරුව ප්‍රාදේශීය සෞඛ්‍ය සේවා අධ්‍යක්‍ෂ වෛද්‍ය ඩබ්ලිව්.කේ.ඩබ්ලිව්.එස්.කුමාරවංශ මහතා පැවැසීය.
 
එම රෝගියා ලංකාපුර ප්‍රාදේශීය ලේකම් කාර්යාලයට අනුයුක්තව රාජකාරී කල සිවිල් ආරක්‍ෂක භටයාගේ පස් හැවිරිදි දියණිය බවද ඒ මහතා කීය.
 
සිවිල් ආරක්‍ෂ භටයාට කොරෝනා වයිරසය ආසාදනය වී ඇති බව ඊයේ ( 02) වැනිදා  පී.සී.ආර් පරීක්‍ෂණ වලින් තහවුරු කරගෙන තිබුණි.

ඉන් පසුව ඔහුගේ  බිරිඳ සහ දියණිය පී.සී.ආර් පරීක්‍ෂණ සඳහා යොමුකර පොලොන්නරුව මහ රෝහලේ කොවිඩ් 19 සැකකටයුතු අය රඳවා තබන වාට්ටුවක නේවාසිකව සිටි අතර එම පරීක්‍ෂණ වාර්තාවලින් දැරියට කොරෝනා වයිරසය ආසාදිතවී ඇති බව තහවුරුවී ඇතැයි වෛද්‍ය කුමාරවංශ මහතා මහතා ප්‍රකාශ කළේය.
 
මේ අනුව ලංකාපුර සෞඛ්‍ය වෛද්‍ය නිලධාරී කොට්ඨාසයෙන් මේ වනවිට හමුවී ඇති කොරෝනා රෝගීන් ගණන 12ක් බව සෞඛ්‍ය අංශ නිල දත්ත අනාවරණය කරයි.
 
මේ රෝගීන් සියළුම දෙනා සමාජයෙන් හමුවූ රෝගීන් නොව කන්දකාඩු කොරෝනා පොකුරේ දිගුවක් ලෙසට හඳුනාගෙන ඇතැයි ප්‍රාදේශිය සෞඛ්‍ය සේවා අධ්‍යක්‍ෂවරයා වැඩිදුරත් සඳහන් කළේය.