(ටී.කේ.ජී.කපිල)

රුපියල් කෝටි හතරක් පමණ වටිනා කැරට් විසි හතරේ රත්තරන් කැබලි තොගයක් නීතිවිරෝධී ලෙස ශ්‍රී ලංකාවට ගෙන ආ ගුවන් මගීන් නව දෙනෙකු අද (20) කටුනායක ගුවන් තොටුපළ පැමිණීමේ පර්යන්තයේ දී රේගු නිලධාරීන් පිරිසක් විසින් අත්අඩංගුවට ගෙන ඇති බව වැඩබලන රේගු මාධ්‍ය ප්‍රකාශක විපුල මිනුවන්පිටිය මහතා පැවසීය.

මොවුන් අතරින් තිදෙනකු ශ්‍රී ලාංකිකයන් වන අතර මෙයින් එක් අයෙකු 23 හැවිරිදි වව්නියාව ප්‍රදේශයේ පදිංචිකරුවෙකු වේ. අනෙක් පුද්ගලයා මහනුවර ප්‍රදේශයේ පදිංචි 64 හැවිරිදි වියේ පසුවනෙකු වූ අතර ඉතිරි පුද්ගලයා කඩුගන්නාව ප්‍රදේශයේ පදිංචි 52 හැවිරිදි අයෙකි.

මීට අමතරව ඉතිරි ගුවන් මගීන් 06 දෙනා ඉන්දීය ජාතිකයන් වන අතර ඔවුන් තමිල්නාඩු ප්‍රාන්තයේ චෙන්නායි නුවර අවට ප්‍රදේශයේ පදිංචිකරුවෝ වෙති.

මොවුන් මෙම රත්තරන් කැබලි ඔවුන්ගේ මුඛයේ සහ ඔවුන් ඇඳ සිටි ඇදුම් අතරත් ඔවුන්ගේ ගමන් භාණ්ඩ පටවා ගෙන ගුවන් තොටුපළ තුළ තල්ලු කරගෙන යන ට්‍රොලි රථ වල යට කොටස් වලද අලවා ගෙන සඟවා ගෙන සිටියදී රේගු නිලධාරීන් විසින් සොයාගෙන අත්අඩංගුවට ගෙන තිබේ.

මෙහි කැරට් විසි හතරේ රත්තරන් කැබලි 59 ක් තිබූ අතර ඒවා කිලෝ ග්‍රෑම් 05 යි ග්‍රෑම් 271 ක බරකින් යුතු වූ රුපියල් තුන් කෝටි අනූ දෙලක්ෂ හතලිස් හත් දහස් අට සිය දහයක් 3,92,47,810 ක් වටිනා බවද වැඩබලන රේගු මාධ්‍ය ප්‍රකාශකවරයා වැඩිදුරටත් පැවසීය.